राम निरौला,
कनकाई खबर \ नेपाल जेसीजको ४८ औं राष्ट्रिय महाधिवेशनबाट अध्यक्षमा दाङको त्रिभुवन नगर जेसीजका पूर्व अध्यक्ष जेसी लालमणि भण्डारी निर्वाचित भएका छन् ।
स्थापनाकालदेखि हाल सम्मको ३७ औं वर्षको इतिहासमा त्रिभुवन नगर जेसीजले भण्डारीलाई पहिलो राष्ट्रिय अध्यक्ष पाएको हो । राष्ट्रिय उपाध्यक्षमा झापाको शिवसताक्षी निवासी युवा सामाजिक अभियन्ता कुमार सिंह साँवा लिम्बू म्यान अफ द इलेक्सनका रुपमा अत्यधिक मतका साथ निर्वाचित भएका छन् । पोखरा जेसीजको आतिथ्यमा सम्पन्न नेपाल जेसीजको महाधिवेशनबाट लिम्बू राष्ट्रिय उपाध्यक्षमा निर्वाचित भएका हुन् । जेसीजको राष्ट्रिय उपाध्यक्षमा निर्वाचित भएका कुमार सिंह साँवा लिम्बू सतासीधाम जेसीजको वर्ष २०२० का अध्यक्ष हुन् ।
महाधिवेशनबाट राष्ट्रिय अध्यक्षमा निर्वाचित भण्डारीसँगै चारजना कार्यकारिणी उपाध्यक्षमा क्रमशः दिपेन्द्र निरौला, सुनिल तिमिल्सिना, रमा कुमारी प्याकुरेल र अनिल बहादुर शाही रहेका छन् । त्यसैगरी १२ जना राष्ट्रिय उपाध्यक्षमा क्रमशः कुमारसिंह साँवा लिम्बू, जीवन कार्की, मनोज कुमार शाह, नेत्रलाल भट्टराई , रश्मि बस्नेत, नरेशचन्द्र ओझा, राम प्रसाद पाण्डे, योगीराज अधिकारी, सन्दीप अग्रहरी, कृष्ण बहादुर श्रेष्ठ, राजिब प्रसाई, जीवन श्रेष्ठ रहेका छन् । जेसीजको विधान अनुसारका मनोनीत पदहरुमा क्रमशः महासचिवमा कृष्ण सापकोटा, कोषाध्यक्षमा कमल पनेरू र कानुनी सल्लाहकारमा गोविन्द देवकोटा चयन भएका छन् ।
राष्ट्रिय उपाध्यक्षमा निर्वाचित सतासीधाम जेसीजका पूर्व अध्यक्ष लिम्बूले आफ्नो कार्यकालमै सतासीधाम जेसीजलाई देशकै उत्कृष्ट शाखाका रुपमा स्थापित गरेर देशभर आफ्नो पहिचान बनाइसकेका थिए । सुरुङ्गा जेसीजले मातृत्व प्रदान गरेको सतासीधाम जेसीजको स्थापना वर्ष २०१२ देखि नै सदस्य हँुदैं जेसीजको माध्यमबाट सामाजिक क्षेत्रमा सक्रिय रहेका लिम्बू वर्ष २०१६ मा सतासीधाम जेसीजको उपाध्यक्ष बन्न सफल भएका थिए । एक सामाजिक अभियन्ताका रुपमा युवाहरु विच लोकप्रिय मानिदै आएका लिम्बू लामो समयदेखी विभिन्न शैक्षिक, सामाजिक तथा संचार क्षेत्रमा समेत क्रियाशिल हुँदै आएका एक जुझारु युवाका रुपमा परिचित छन् ।
नेतृत्व क्षमताको सफल प्रयोगकालागि जेसीजको प्लेट फर्म पाएका लिम्बूले सतासीधाम जेसीज वर्ष २०१७ मा तालिम संयोजकको जिम्मेवारीमा रहेर आफ्नो सफल नेतृत्वको क्षमता प्रदर्शन गरिसकेका थिए । क्रमिक रुपले वर्ष २०१८ मा कार्यकारिणी उपाध्यक्ष, वर्ष २०१९ मा महासचिव हुँदै वर्ष २०२० मा सतासीधाम जेसीजको उत्कृष्ट अध्यक्ष बन्न सफल भएका लिम्बू वर्ष २०२१ मा समेत राष्ट्रिय उपाध्यक्षको उम्मेद्वार बनेर सम्मानजनक मत प्राप्त गर्दै उपविजेता बनेका थिए । सतासीधाम जेसीज वर्ष २०२० लाई, “सबल व्यक्तित्व तथा नेतृत्व विकास र सामाजिक रुपान्तरणका लागि सतासीधाम जेसीज वर्ष २०२०” भन्ने प्रमुख प्रकरण (थिम) र अभियानका साथ लिम्बूले सतासीधाम जेसीजलाई नेतृत्व प्रदान गरेका थिए ।
नेपाल जेसीजको राष्ट्रिय उपाध्यक्षमा निर्वाचित भएसँगै कनकाई खबरसँगको सम्पर्कमा जेसीज अभियन्ता लिम्बूले आँफूमा थप जिम्मेवारीका साथ नयाँ हौसला एवम् उर्जा प्राप्त भएको प्रतिक्रिया दिएका छन् । जेसीजका नवनिर्वाचित राष्ट्रिय उपाध्यक्ष लिम्बूले जेसीजबाट सिकेको ज्ञान, सिप, अनुभव साथै आफ्नो नेतृत्व क्षमताको स्थानीय स्तरमा समेत प्रयोग गर्दै समाज रुपान्तरणमा सक्रिय रहने प्रतिवद्धता जनाएका छन् ।
