कनकाई खबर \ प्रदेश नं. १ पालिका स्तरीय दोस्रो अध्यक्ष कप भलिबल प्रतियोगिता झापाको शरणामतिमा सुरु भएको छ ।
झापा गाउँपालिका—६ शरणामति स्थित जनता माविको खेलमैदानमा सुरु भएको प्रतियोगिताको आयोजक झापा गाउँपालिकाका अध्यक्ष जयनारायण शाहले उद्घाटन गरेका थिए । प्रतियोगितामा झापाका १० पालिकासहित प्रदेश नं.१ का अन्य ६ वटा पालिका गरी १६ वटा टिमको सहभागिता रहेको छ । प्रतियोगिता उद्घाटनको पहिलो दिन सोमबार सम्पन्न तीनवटा खेलमा क्रमशः झापाको दमक नगरपालिका र झापा गाउँपालिका साथै भोजपुरको षडानन्द नगरपालिकाले अग्रता कायम गरेका छन् ।
आयोजक झापा गाउँपालिकाले तय गरेको खेल तालिका अनुसार दमक र मेची नगरपालिका विच हुने भनिएको पहिलो खेलमा मेची नगरको भलिबल टिम उपस्थित नभएपछि वाकओभरमा दमक नगरपालिकाको टिमलाई विजेता घोषित गरिएको छ ।
त्यस्तै दोस्रो खेल झापाको कनकाई नगरपालिका र भोजपुरको षडानन्द नगरपालिका विच सम्पन्न भएकोमा षडानन्द नगरपालिका विजयी बनेको हो । विजेता षडानन्द नगरपालिकाले २५\२०, २५\२० र २५\२२ को अन्तरले कनकाई नगरपालिकालाई पछि पारेको हो । कनकाई नगरपालिकाले भने खेलको दोस्रो सेटमा २५\२२ को अन्तरले एक सेट मात्र जित्न सफल भएको आयोजक समितिका सचिव मोहन मिश्रले जानकारी दिएका छन् । खेलको म्यान अफ द म्याच षडानन्द नगरपालिका तर्फका खेलाडी भुवन गौतम घोषित भएका छन् ।
त्यस्तै आजको तेस्रो खेल आयोजक झापा गाउँपालिका र बाह्रदशी गाउँपालिका विच सम्पन्न भएकोमा झापा गाउँपालिकाको टिम विजयी बनेको छ । विजेता झापा गाउँपालिकाले २६ \ २४, २५ \ १० र २५ \ ९ को अन्तरले बाह्रदशी गाउँपालिकालाई पछि पारेको हो । बाह्रदशीले खेलको तेस्रो सेटमा २५ \ २३ को अन्तरले एक सेट मात्र जित्न सफल भएको आयोजक समितिले जनाएको छ । खेलको म्यान अफ द म्याच विजेता टिमका रोहित शिवाकोटी घोषित भएका छन् ।
सोमबारदेखि संचालन भएको प्रतियोगिता पुष १० गते शनिवार समापन हुने आयोजक समितिका सल्लाहकार संयोजक गजेन्द्र ताम्लीले बताए ।
प्रतियोगितामा प्रथम हुने टिमलाई १ लाख ५१ हजार र दोस्रो हुने टिमलाई १ लाख नगदसहित मेडल, प्रमाण पत्र र ट्रफी प्रदान गरिने आयोजक समितिले जनाएको छ । प्रतियोगितालाई निरन्तर अघि बढाउँन हरेक वर्ष हुने आर्थिक व्यय भारलाई न्युनीकरण गर्ने उद्येश्यले आयोजक समितिले स्थापना गरेको अक्षय कोषमा समेत दाताहरुले सहयोग गर्न थालेका छन् । अक्षयकोषमा कनकाई ३ निवासी आशिष संग्रौलाले रु.५ हजार सहयोग गरेको बताइएको छ । अन्य दाताहरुबाट समेत अक्षयकोषमा सहयोग रकम संकलन हुँदै गरेको बताइएको छ ।
प्रतियोगिताको उद्घाटन समारोहमा स्थानीय पाथीभरा र चन्द्रज्योती अंग्रेजी माध्यमिक विद्यालयका विद्यार्थीहरुले मार्च पास गरेका थिए भने जनता माध्यमिक विद्यालका विद्यार्थीले स्वागत नृत्य प्रस्तुत गरेका थिए । खेल आयोजक समितिका संयोजक तेजप्रसाद भट्टराईको सभापतित्व एवम् उपाध्यक्ष दुर्गाबहादुर पौडेलले स्वागत गरेको उद्घाटन समारोहको संचालन सचिव मोहन मिश्रले गरेका थिए ।
