कनकाई खबर \ झापा गाउँपालिकाको आयोजनामा प्रदेश नं. १ पालिका स्तरीय दोस्रो अध्यक्ष कप भलिबल प्रतियोगिता संचालन हुने भएको छ ।
झापा गाउँपालिका—६ शरणामति स्थित जनता माविको खेलमैदानमा यहि पुष ५ गतेदेखि संचालन भई १० गते समापन हुने प्रतियोगिताका विषयमा पत्रकार सम्मेलन मार्फत अयोजक समितिले जानकरी गराएको छ ।
भलिबल प्रतियोगितामा झापाका १० पालिकासहित प्रदेश नं.१ का १६ वटा टिमको सहभागिता रहने बताइएको छ । प्रतियोगितामा प्रथम हुने टिमलाई १ लाख ५१ हजार र दोस्रो हुने टिमलाई १ लाख नगदसहित मेडल, प्रमाण पत्र र ट्रफी प्रदान गरिने खेल आयोजक समितिका संयोजक तेजप्रसाद भट्टराईले जानकारी दिए । प्रतियोगिता समापन गर्न ११ लाख रुपैंया खर्चको अनुमान गरिएको जानकारी दिँदै संयोजक भट्टराईले आगामी खेलकालागि आर्थिक पक्षको व्यवस्थापन सहज बनाउँने उद्येश्यका साथ अक्षयकोष स्थापना गर्ने योजना रहेको बताए ।
प्रतियोगिताको सेमिफाइनलबाट बाहिरिने टोलीले समेत पुरस्कार बापत १५ हजार नगद प्राप्त गर्ने आयोजकले जनाएको छ । त्यस्तै विधागत तर्फ समेत सर्वोत्कृष्ट खेलाडीले नगद ११ हजार हात पार्ने छन् भने उत्कृष्ट सर्भर, उत्कृष्ट स्पाइकर, उत्कृष्ट सेटर, उत्कृष्ट डिफेन्स र उत्कृष्ट ब्लकरले जनही ५ हजार ५ सय प्राप्त गर्ने आयोजक समितिका सचिव मोहन मिश्रले जानकारी दिए ।
प्रतियोगिताको मुख्य प्रायोजकका रुपमा ट्राइगर ब्रअरी रहेको छ भने सह–प्रायोजकका रुपमा एन.आइ.सी.एशिया बैंक, एनी ग्रुप तथा कनकाई गार्भेन्ट दुधे र शरणामती केवल नेटवर्क रहेका छन् ।
राष्ट्रिय स्तरका खेलाडी उत्पादन भइसकेको झापा गाउँपालिका क्षेत्रमा हुने प्रतियोगितालाई विशेष महत्वका साथ हेरिने गरेको आयोजक समितिका सल्लाहकार संयोजक गजेन्द्र ताम्लीले बताएका छन् । स्थानीयबासीको खेल प्रतीको रुची अथाहा भएकाले झापा गाउँपालिकामा भलिवलको कुम्भमेला देख्न सकिने सल्लाहकार संयोजक ताम्लीले जानकारी दिए ।
