कनकाई खबर \ झापा क्षेत्र नं. ४ अन्तर्गत संचालन भएको वडा स्तरीय दिलमाया स्मृति कपको उपाधि शिवसताक्षी ११ले हात पारेको छ ।
दोस्रो चरण अन्तर्गतको सुपर आठ फुटबल प्रतियोगिताबाट झापा गाउँपालिका ६ लाई सडनडेथमा हराउँदै शिवसताक्षी ११ ले उपाधि हात पारेको हो । ट्राइबेकरमा ७–६ गोल अन्तरले झापा ६ लाई हराउँदै शिवसताक्षी ११ ले उपाधि हात पारेको आयोजक नेपाल खेलकुद महासंघका सदस्य एवम् खेल संयोजक सुनिल भेट्वालले जानकारी दिएका छन् ।
झापा क्षेत्र नं.४ का संघीय सांसद एलपी साँवा लिम्बूकी ममतामयी माता स्व.दिलमाया लिम्बूको स्मृत्तिमा वुद्धिमान साँवा लिम्बू साथै परिवारका तर्फबाट प्रायोजन गरीएको प्रतियोगिताको उपाधिकालागि शनिवार दुधे रङ्गशालामा प्रतिस्पर्धात्मक खेल सम्पन्न भएको हो । प्रतियोगिताको पहिलो हाफ गोल रहित बराबरीमा टुंगिएको थियो । खेलको दोस्रो हाफको १८ मिनेटमा शिवसताक्षीका लागि जर्सी नं. १३ का सुरज मगरले गोल गरेका थिए ।
दोस्रो हाफको ३९ औं मिनेटमा झापा ६ का तर्फबाट जर्सी नं. १२ का नन्दु हेमरमलाई गोल फर्काउन सफल भए । योसँगै खेल ट्राइबेकरमा धकेलिएको थियो । ट्राइबेकरमा दुवै टिमबाट गोल बराबरी भएपछि खेल सडेनडेथमा धकेलिएको थियो । झापा ६ का तर्फबाट हानेको गोल शिवसताक्षी ११ का गोल किप्परले बचाउ गरेपछि शिवसताक्षीले उपाधि चुमेको हो ।
खेलको विजेता शिवसताक्षी ११ ले २ लाख २५ हजार सहित शिल्ड, मेडल र प्रमाण पत्र प्राप्त गरेका छन् । त्यस्तै उपविजेता टिम झापा गाउँपालिका ६ ले नगद १ लाख २५ हजार सहित शिल्ड, मेडल र प्रमाण पत्र प्राप्त गरेका थिए ।
खेलको म्यान अफ दि म्याच शिवसताक्षी ११ का गोल किपर सिमसन राई घोषित भए । उनले नगद २ हजार ५ सय प्राप्त गरे । दिलमाया स्मृति कपको सर्वाधिक गोलकर्ता झापा ६ का सुजन पौडेल, उत्कृष्ट डिफेन्डर शिवसताक्षी ११ जेरन राई, उत्कृष्ट मिड फिल्डर शिवसताक्षीका सन्जोग मगर, सर्वोत्कृष्ट गोल किप्पर शिवसताक्षी १० टेकराज योङ्गहाङ्ग घोषित भए । उनीहरुले जनही ५ हजार प्राप्त गरे । त्यस्तै सर्वोत्कृष्ट खेलाडी शिवसताक्षी ११ का निकेश श्रेष्ठ घोषित भए । उनले नगद १० हजार प्राप्त गरे ।
कार्यक्रममा पूर्व खेलाडी तथा प्रशिक्षक सन्तबहादुर रायमाझी, लिलु गिरी, दिलकुमार कार्की, राजेन्द्र कुमार श्रेष्ठ , जान ताप्ली लिम्बु, सन्जीत राई, अनन्त तामाङ्ग, नितेश श्रेष्ठलाई विशेष सम्मान गरिएको खेल संयोजक खेलकुद महासंघका सदस्य भेट्वालले जानकारी दिए । विजेता खेलाडी साथै सम्मानित सवैलाई कार्यक्रमका प्रमुख अतिथि प्रदेश नं. ३ का पूर्व प्रदेश प्रमुख विष्णु प्रसाद प्रसाई साथै प्रायोजकका तर्फबाट झापा क्षेत्र नं. ४ का संघीय सांंसद एलपी साँवा लिम्बूले सम्मान पत्र प्रदान गरेका थिए । स्व.माता दिलमायाको स्मृत्तिमा संचालन गरिएको प्रतियोगितालाई आगामी वर्षमा समेत निरन्तरता दिँदै जाने प्रायोजकका तर्फबाट संघीय सांसद साँवाले प्रतिवद्धता जनाएका छन् ।
खेल संयोजक सुनिल भेट्वालको सभापतित्वमा सम्पन्न प्रतियोगिताको औपचारीक कार्यक्रमको संचालन संघीय सांसद साँवाका स्वकीय सचिव सिक्किन पासवानले गरेका थिए ।
