कनकाई खबर \ शिवसताक्षीमा जारी दिलमाया स्मृति सुपर ८ को खेलमा शिवसताक्षी ११ फाइनलमा प्रवेश गरेको छ ।
शिवसताक्षीको दूधे रंंगशालामा जारी कपको बुधबारको पहिलो सेमीफाइनल खेलमा शिवसताक्षी १०लाई १–० गोल अन्तरले हराउँदै शिवसताक्षी ११ फाइनलमा प्रवेश गरेको हो ।
खेलको ३ मिनेटमा शिवसताक्षी ११ को तर्फबाट जर्सी नं. १७ का अजेस राईले गरेको गोल नै निर्णायक गोल हुन पुग्यो । दुवै तर्फबाट प्रतिस्पर्धात्मक खेल भएपनि वडा नं. १० ले कुनै पनि गोल गर्न सकेन । दुवै टिमका खेलाडीहरुले थुप्रै गोल गर्ने अवसर गुमाए ।
शिवसताक्षी १० का जर्सी नं. ७ का पवन राईले डिबक्स भित्रबाट प्रहार गरेको बल किप्परलाई विट गर्दा पनि शिवसताक्षी ११ का जर्सी नं. २ का जेरन राईले बचाउन सफल भएका थिए ।
खेलको म्यान अफ दी म्याच शिवसताक्षी ११ का जेरन राई घोषित भए । उनले नगद २५०० प्राप्त गरे ।
खेलको विजेता टिमले २ लाख २५ हजार प्राप्त गर्ने छन् भने उपविजेता टिमले नगद १ लाख २५ हजारसहित शिल्ड, मेडल प्रमाणपत्र प्राप्त गर्ने आयोजक नेपाल खेलकुद महासंघले जनाएको छ ।
विहीबार हुने अन्तिम सेमीफाइनल खेल कनकाई ५ र झापा गाउँपालिका ६ बीच हुने आयोजक नेपाल खेलकुद महासंघले जनाएको छ । यस क्षेत्रका संघिय सांसद एलपी साँबा लिम्बूको माताको स्मृतिमा झापा क्षेत्र नम्बर ४ भरीका २८ वडाको सहभागितामा यस प्रतियोगिताको आयोजना गरिएको आयोजक समितिका संयोजक सुनिल भेटवालले बताए ।
