कनकाई खबर \ झापाको कनकाई ७ दुर्गापुरका स्थायी निवासी यस क्षेत्रकै पुराना समाजसेवी कुमुदिनी पोखरेलको निधन भएको छ ।
कनकाई सुरुङ्गा प्रेस क्लवका सल्लाहकार साथै विभिन्न सामाजिक क्षेत्रमा नेतृत्व तहमा रहेका सामाजिक अभियन्ता कुमारमणि पोखरेल एवम् सरला पोखरेल लगायतका बुबा एवम् ससुराबुबा समाजसेवी स्व.पोखरेलको उपचारका क्रममा सिलिगुडीस्थित न्युटिया हस्पिटलमा आज विहान निधन भएको हो ।
उच्च रक्तचापका कारण केही वर्ष अघिदेखि शारीरिक रुपमा अस्वस्थ भएका पोखरेल स्वास्थ्य उपचारपछि सामान्य अवस्थामा जीवन विताइरहेका थिए । केही दिनअघि मात्र स्वास्थ्यमा थप समस्या आएपछि उपचारकालागि उहाँलाई सिलिगुडी लगिएको थियो ।
यस क्षेत्रका सम्मानित जेष्ठ सदस्य, सादा जीवन उच्च विचारका धनी समाजसेवी पोखरेलको आज मंगलबार दिउँसो ३ बजे कनकाई माईमा अन्तिम दाहसंस्कार गरिने पारिवारीक स्रोतले जनाएको छ । सामाजिक संजालमा प्राप्त पारिवारीक विवरणमा स्व.पोखरेलका छोराहरु कुमारमणि, भरत, देवमणी र शिशिर रहेको जनाइएको छ । थप विवरण प्राप्त हुनासाथ प्रकाशित गरिनेछ ।
स्व.पोखरेलप्रति गहिरो समवेदना प्रकट गर्दै परिवारजनमा धैर्यधारण गर्ने ईश्वरीय शक्ति प्राप्त होस् भन्ने कामना सहित कनकाई खबर डटकम अनलाइन एवम् कनकाई खबर साप्ताहिक परिवार हार्दिक श्रद्धासुमन अर्पण गर्दछ ।
