कनकाई खबर / नेपाली कांग्रेस झापाको सभापतिमा देउमान थेवे आफ्नो प्यानलसहित निर्वाचित भएका छन् । थेवेले २ सय ५० मतान्तरले सभापति पदका उम्मेदवार रामबहादुर कट्टेललाई पराजित गरेका हुन् ।
कांग्रेस झापाको १४ औं महाधिवेशन अन्तर्गत भएको निर्वाचनमा १ हजार ७ सय ६५ मत प्राप्त गरी थेवे सभापतिमा निर्वाचित भएका हुन् । यसअघि पार्टीको जिल्ला उपसभापति, महासमिति सदस्यसहित विभिन्न तहको नेतृत्वमा रहेर सफलतापूर्वक पार्टीको जिम्मेवारी सम्हालिसकेका हक्की स्वभावका थेवे एक प्रष्ट बक्ताका रुपमा चिनिन्छन् । सभापति पदका प्रत्यासी कट्टेलले १ हजार ५ सय १५ मत प्राप्त गरेका थिए ।
त्यस्तै उपसभापतिमा थेवे प्यानलकै शेरबहादुर भट्टराई १हजार ६ सय ७४, केशवराज पाण्डे १हजार ८ सय ८९ मत प्राप्त गरी निर्वाचित भएका छन् भने उनीहरुका प्रतिष्पर्धी कट्टेल प्यानलका प्रेम सम्बाहाम्फेले १ हजार ४ सय १५, शमशेर गिरीले १ हजार २ सय २१मत प्राप्त गरे ।
यस्तै सचिवमा थेवे प्यानलकै नविन विमली १ हजार ८ सय ३८ र कृष्ण हुँमागाईले १ हजार ६ सय ७६ मत प्राप्त गरी निर्वाचित भएका छन् । उनीहरुका प्रतिष्पर्धी कट्टेल प्यानलका विश्वदीप लिङ्देनले १ हजार ४ सय ३१ मत र टोमलाल राजबंशीले १ हजार ३ सय १५ मत प्राप्त गरेका छन् ।
त्यस्तै सहसचिवमा थेवे प्यानलका कमलप्रसाद भण्डारीले १ हजार ७ सय ६० र कालेन्द्र राजवंशीले १ हजार ७ सय ६५ मत प्राप्त गरी निर्वाचित भएका छन् । उनीहरुका प्रतिष्पर्धी कट्टेल प्यानलका पदम लिम्बूले १हजार ३ सय ४७ मत र उमाराम प्रसाईले १हजार ३ सय ३७ मत प्राप्त गरेका छन् । सुक्रबार भएको निर्वाचनमा ३ हजार ३ सय ११ मत खसेको थियो ।
दुईवटा प्यानल खडा गरी भएको निर्वाचनमा कांग्रेस नेता कृष्णप्रसाद सिटौलाको प्यानलबाट थेवे र युवा नेता विश्वप्रकाश शर्माको प्यानलबाट कट्टेललाई उम्मेद्वार बनाइएको थियो ।
