कनकाई खबर \ कोरोना संक्रमणबाट निधन भएका नगरवासीलाई कनकाई नगरपालिकाले राहत स्वरुप सहयोग रकम हस्तान्तरण गरेको छ ।
नगरपालिकाले आर्थिक वर्ष २०७८÷०७९ को नीति, कार्यक्रम तथा बजेटमै समावेश गरेर कोरोना संक्रमणबाट निधन भएका परिवारका सदस्यलाई राहत स्वरुप रु.२० हजार नगद सहयोग गरेको हो । केही दिन अघि राहत रकम हस्तान्तरका विषयमा नगरपालिकाले सूचना जारी गरेपछि सम्पर्कमा आउँने मृतक परिवारका सदस्यलाई कनकाई नगरपालिकाका प्रमुख राजेन्द्र पोखरेलले राहत रकम हस्तान्तरण गरेका हुन् ।
पहिलो चरणमा सम्पर्कमा आएर राहत रकम ग्रहण गर्नेमा कनकाई ३ स्थायी ठेगाना भएका तारानाथ पाठक रहेका छन् । उनकी श्रीमति सीताकुमारी पाठकको कोरोनाका कारण निधन भएको थियो । त्यस्तै कनकाई ४ निवासी मृतक नन्दलाल भेट्वाल र यमुना भेट्वालका नाती बासुदेव भेट्वालले दुवैजना मृतकको राहत रकम ग्रहण गरेका छन् ।
कोरोना संक्रमणको पहिलो र दोस्रो लहरमा नगरपालिकालाई जानकारी भएसम्म कनकाईमा ४३ जनाको निधन भएको नगर स्वास्थ्य कार्यालयका जनस्वास्थ्य निरीक्षक नारायण अधिकारीले जानकारी दिएका छन् । राहत रकमकालागि सम्बन्धित परिवारलाई पत्राचार गरिसकिएको भएपनि माग अनुसारका आवश्यक कागजात अपुग हुँदा समस्या हुने गरेकाले कागजात पूरा गरेर मात्र नगरपालिकामा आउँन सम्बन्धित परिवारलाई जनस्वास्थ्य निरीक्षक अधिकारीले अनुरोध गरेका छन् । राहत रकम प्राप्त गर्नकालागि सम्बन्धित व्यक्तिको पिसिआर तथा एन्टीजेन रिपोर्ट, अस्पतालले दिएको मृतकको कागज, मृत्यु दर्ता प्रमाण पत्र, वडा कार्यालयको सिफारीस, नाता प्रमाणित भएको कागजात लगायतका प्रमाणहरु आवश्यक पर्ने जनाइएको छ ।
