कनकाई खबर डेक्स \ संघीय मामिला तथा सामान्य प्रशासन मन्त्रालयवाट आएको सर्कुलरका विषयमा असन्तुष्टी जाहेर गर्दै कनकाई नगरपालिकाको कार्यालयमा कर्मचारी र जनप्रतिनिधीहरुले एक घण्टा सेवा अवरुद्ध गरेका छन् ।
नगरका सवै कर्मचारी र वडाअध्यक्षहरु आफ्नो कार्यकक्षवाट वाहिरिएपछि एक घण्टासम्म कामकाज ठप्प भएको हो । जनप्रतिनिधीसहित आक्रोसीत भएका कर्मचारीहरुले प्रमुख प्रशाकीय अधिकृत गणेशप्रसाद बरालको कार्यकक्ष अगाडी ढोकासम्म आएर होहल्ला गर्दै अधिकृत वरालको विरुद्धमा चर्को आवाज उठाउँन थालेपछि नगरप्रमुख राजेन्द्र पोखरेलले आफ्नो कार्यकक्षवाट आएर स्थितीलाई सामान्य वनाएका थिए ।
नगर प्रमुख पोखरेल, उपप्रमुख मन्जु प्रसाईँ र वडाअध्यक्षहरु साथै अन्य जनप्रतिनिधीहरु कसैलाई पनि जानकारी नगराईकन प्रमुख प्रशासकीय अधिकृत बरालले कार्यालयमा करारमा कार्यरत पाँचजना कर्मचारीहरुलाई सेवावाट विदा दिने गरिको ठाडो निर्देशन गरेको भन्दै जनप्रतिनीधीहरु र नगरका कर्मचारीहरुले आक्रोश पोखेका हुन् । मन्त्रालयवाट आएको सर्कुलरका विषयमा स्थानीय सरकार प्रमुखलाई समेत प्रष्ट रुपमा जानकारी नभएको भन्दै नगर प्रमुख पोखरेलले समस्या कनकाईको मात्र नभएर मुलुकभरीकै भएकाले यथार्थ कुरा बाहिर नआउँन्जेल तत्कालका लागि आआफ्नो जिम्मेवारी सम्हाल्न सवै कर्मचारीलाई अनुरोध गरेपछि अवस्था सामान्य बनेको हो ।
प्रमुख प्रशासकीय अधिकृत बरालले संघीय मामिला तथा सामान्य प्रशासन मन्त्रालयवाट मासिक डोर र ज्यालादारीका कर्मचारीहरुको सम्वन्धमा स्थानीय तहलाई आएको सर्कुलर अनुसार कनकाई नगरपालिकामा करारमा कार्यरत कर्मचारीहरुलाई निर्देशन गरेको वताए । करारमा रहेका कर्मचारीहरुको म्याद थप नगर्ने भन्ने कुरा मन्त्रालयवाट सर्कुलर आएअनुसार सोही अनुरुप कार्यन्वयन तर्फ जानुपर्नेमा प्रमुख प्रशासकीय अधिकृत बरालले प्रष्ट पारेका थिए । कनकाई नगरपालिकामा करार कर्मचारीका रुपमा उमानाथ ढकाल, डिल्लीराम विक, देवका पौडेल, संगीता पौडेल र रुपा वस्नेत लामो समयदेखी कार्यरत छन् ।
नेपाल सरकारले नयाँ दरबन्दी स्वीकृत गरिसकेकाले विभिन्न स्थानीय तहहरुमा उक्त स्वीकृत दरवन्दी बमोजीमका पदहरु बाहेक अन्य पदहरुमा पनि कर्मचारीहरुले करारमा सेवा दिइरहेका छन् । अब संघीय मामिला तथा सामान्य प्रशासन मन्त्रालयले २०७५।१०। ८ मा गरेको निर्णय अनुसार स्वीकृत दरवन्दी भन्दा बाहेक अन्य विभिन्न पदहरुमा कर्मचारी राखी तलव, भत्ता वा पारिश्रमिक भुक्तानी गर्न नमिल्ने, यस्तो कार्य प्रचलित कानून विपरित भई बेरुजु कायम हुने हुँदा बेरुजु भएको उक्त रकम भुक्तानी गर्ने पदाधिकारीवाट असुल उपर हुने व्यहोराको सर्कुलर आएको हुँदा सम्वन्धित कर्मचारीहरुलाई सोही बमोजीमको जानकारी गराएको कनकाई नगरपालिकाका प्रमुख प्रशासकीय अधिकृत गणेशप्रसाद बरालले वताएका छन् ।
सम्वन्धीत कर्मचारीहरुलाई मन्त्रालयवाट आएको सर्कुलरका वारेमा जानकारी गराएको विषयमा आक्रोशित वनेका केही जनप्रतिनिधी र कर्मचारीहरुप्रति दुःख व्यक्त गर्दै प्रमुख प्रशासकीय अधिकृत बरालले राज्यको निति नियम र कानुनको दायराभित्र रहेर चल्नु पर्ने आँफ्नो जिम्मेवारीलाई पूरा गर्न कुनै कन्चुस्याईँ नगर्ने प्रष्ट पारेका छन् ।
प्रमुख प्रशासकीय अधिकृत बरालले स्थनीय तहका जनप्रतिनिधी र सवै तहका कर्मचारीका विषयमा आँफू सर्धै सकारात्मक रहेको वताउँदै सवै कुरा राज्यको कानुन अनुसार कार्यान्वयन हुने हुँदा सोही अनुरुप प्रष्ट हुन सम्वन्धित सवैलाई अनुरोध गरेका छन् ।
