दुर्गापुर / जेष्ठ नागरिक संघ कनकाई नगर समितिले एकदिवशीय निशुल्क आँखा शिविर कार्यक्रम सम्पन्न गरेको छ । कनकाई नगर वडा नं.७ तल्लो टोलस्थित जमुना उप्रेती र भानुभक्त उप्रेती साथै हरिबोधनी किर्तन भजन समूहको व्यवस्थापनमा सम्पन्न भएको आँखा शिविरवाट २१५ जना स्थानीयवासी लाभान्वीत भएको जेष्ठ नागरिक संघ वडा नं. ७ की सहसचिव सीता ओलीले वताएकी छन् ।
शिविरमा आँखा परिक्षण गरिनुका साथै आवश्यक्ता अनुसार निशुल्क औषधी वितरण गरिएको छ भने चस्माको आवश्यक पर्ने आँखाका विरामीहरुलाई ५० प्रतिशत छुटमा चस्मा वितरण गरिएको वताइएको छ । आँखा परिक्षण गर्दा अप्रेशन गर्नु पर्ने अवस्था भएका १२ जना आँखाका विरामीहरुलाई जेष्ठ नागरिक संघको सिफारीसमा मेची आँखा अस्पतालमा निशुल्क अप्रेसनका लागि रेफर गरिएको जेष्ठ नागरिक संघ कनकाई नगर समितिका सचिव शम्भु पोखरेलले वताएका छन् ।
निशुल्क आँखा शिविरमा मेची आँखा अस्पतालको प्राविधिक सहयोग रहेको वताइएको छ । जेष्ठ नागरिक संघ कनकाई नगर समितिका अध्यक्ष पुण्यप्रसाद वाराकोटीको सभापतित्व एवम् कनकाई नगरपालिकाका प्रमुख राजेन्द्रकुमार पोखरेलको प्रमुख आतिथ्य रहेको निशुल्क आँखा शिविरमा स्थानीय ९० वर्षिया बेदनिधी सिटौलाको आँखा परिक्षण गरेर शिविरको उद्घाटन गरिएको थियो । जेष्ठ नागरिक संघ कनकाई नगर समितिका उपाध्यक्ष गोपाल चुडालले स्वागत गरेको कार्यक्रमको उद्घाटन समारोहमा संघका वडा नं. ७ का सदस्य टिकाराम निरौलाले स्वस्तीवाचन गरेका थिए ।
कनकाई नगरपालिकाकी उपप्रमुख मन्जु प्रसाईँ, वडा नं.७ का वडा अध्यक्ष लिलावहादुर कन्दङ्वा, संघका नगर सहसचिव यामनाथ सेड्याईँ, वडा नं. ७ का अध्यक्ष धनराज खड्का, वडा नं.४ का अध्यक्ष विनोद शर्मादहाल, वडा नं.३ का अध्यक्ष रघुनाथ भट्टराई लगायतले मन्तव्य राखेको कार्यक्रमको संचालन नगर सचिव शम्भु पोखरेलले गरेका थिए ।
