कनकाई खबर / छठ पर्वको अवसरमा कनकाई छठ सेवा समाजले सम्मानसहितको विविध साँस्कृतिक प्रस्तुतीका साथ छठ पर्व मनाएको छ ।
कनकाई माइको पूर्वी किनारमा अस्ताउँदो सूर्यको पूजा आरधाना गर्ने कार्यकालागि छठ समाजले व्यवस्थापन गरेको विभिन्न जातजातीको झाँकीसहितको र्याली सुरुङ्गा बजार परिक्रमा गरी पूूजा स्थल सम्म पुगेको थियो । छठ समाजले सजाएको ७५ वटा स्टल साथै मञ्च व्यवस्थापनले नदि किनार बेहुली झैं सिगारीएको देखिन्थ्यो ।
विभिन्न जातजाती, धर्मावलम्बीहरुले सामुहिक पर्वका रुपमा मनाउँदै आएको छठ पर्वलाई थप व्यवस्थित गर्दै कनकाई छठ सेवा समाजले संस्थालाई महत्वपूर्ण योगदान दिने व्यक्तित्वहरुलाई सम्मान समेत गरेको छ । विविध साँस्कृतिक प्रस्तुुतीसहित आयोजना गरिएको औपचारिक कार्यक्रममा समाजका जेष्ठ नागरिक जोगेन्द्र प्रधान सुडी र संस्थाका सहयोगी विरेन्द्र शाहलाई सम्मान गरिएको छ ।
कार्यक्रमका प्रमुख अतिथी प्रदेश सभा सदस्य हिराकुमार थापाले सम्मानित दुबैजनालाई सम्मानपत्रसहित र दोसल्ला ओढाएर सम्मान गरेका थिए । सम्मानित दुबैको परिचय समाजका वरिष्ठ उपाध्यक्ष खगेन्द्र महत्तोले गराएका थिए । कार्यक्रमकै अवसरमा संस्थालाई जग्गा दान गर्ने दातालाई समेत सम्मान गरिएको छ भने कार्यक्रम व्यवस्थापनमा सहयोग गर्ने विभिन्न व्यक्तित्वहरुलाई प्रशंसा पत्र प्रदान गरिएको थियो ।
कनकाई छठ सेवा समाजका अध्यक्ष राजकिशोर चौधरीको सभापतित्व एवम् वरिष्ठ उपाध्यक्ष खगेन्द्र महतोले स्वागत गरेको कार्यक्रममा समाजका वरिष्ठ सल्लाहकार जगतनारायण मण्डलले औचित्यमाथि प्रकाश पारेका थिए । कार्यक्रमलाई सम्बोधन गर्दै प्रमुख अतिथीका रुपमा रहेका प्रदेश सभा सदस्य हिराकुमार थापाले कनकाई छठ सेवा समाजले सामाजिक क्षेत्रमा आफ्नो छुट्टै पहिचान स्थापित गर्न सफल भएको भन्दै खुशी व्यक्त गरेका छन् । सम्पूर्ण जात जातिको साझा प्रतिनिधित्व हुने गरी समावेशी रूपमा छठ पूजाको आयोजना भएको भन्दै प्रदेश सभा सदस्य थापा, संविधान सभा सदस्य अम्बिका राजवंशी, कनकाई ३ का वडाअध्यक्ष रुद्रप्रसाद चिमारीया, कनकाई सामुदायिक वनका अध्यक्ष ख्याम ओली लगायतले छठी माइको प्रभावले सबैमा एकता र सद्भाव कायम होस् भन्ने शुभकामना व्यक्त गरे ।
प्रदेश स्वास्थ्य आपुर्ती व्यवस्थापन केन्द्र प्रदेश नं.१ विराटनगरका प्रमुख शम्भु शाहले छठपूजा समानता र समावेशीको प्रतिकको रुपमा विकास हुँदै आएकोमा खुशी व्यक्त गर्दै कनकाई छठ सेवा समाजले पछिल्लो समयमा गरेको प्रगतिको प्रशंसा गरेका छन् । विविध साँस्कृतिक कार्यक्रम साथै सन्थाली झाँकी र नृत्य समेतको आयोजना गरिएको कार्यक्रमको संचालन कनकाई छठ सेवा समाजका महासचिव रविन गुप्ताले गरेका थिए भने साँस्कृतिक कार्यक्रमको सहजीकरण पत्रकार अनुप भण्डारीले गरेका थिए ।
