कनकाई खबर \ ‘मेरो जनगणना मेरो सहभागिता’ भन्ने मूल नाराका साथ राष्ट्रिय जनगणना २०७८ को दोस्रो चरणको मुख्य जनगणनाको लागि कनकाई नगरपालिका र झापा गाउँपालिकामा छनोट भएका गणकहरुको चार दिने तालिम समापन भएको छ ।
कनकाई बहुमुखी क्याम्पस सुरुङ्गाको सभाहलमा चारदिन सम्म संचालन भएको तालिम शनिवार समापन भएको हो । जिल्ला जनगणना कार्यालय दमक र कनकाइ नगरपालिका एवं झापा गाउँपालिकाको स्थानीय जनगणना कार्यालयको संयुक्त आयोजनामा सम्पन्न तालिममा १ सय ३ जना गणकहरुको सहभागिता रहेको बताइएको छ । तालिममा कृष्ण रिमाल, मेदनी पाठक, नरहरी न्यौपाने र चन्द्रविनोद कोइरालाले मुख्य प्रशिक्षकको भूमिका निर्वाह गरेका थिए । कात्तिक २५ देखी मंसीर ९ गतेसम्म घरघरमा गएर गणकहरुले तथ्यांक संकलन गर्ने कार्यमा सबै सचेत नागरिकले आआफ्नो स्थानबाट सहयोग गर्न समेत अनुरोध गरिएको छ ।
कनकाई नगरपालिकाका प्रमुख प्रशासकीय अधिकृत एवम् स्थानीय जनगणना समन्वय समिति कनकाईका संयोजक मोहनप्रसाद न्यौपानेको अध्यक्षता एवम् झापा गाउँपालिकाका अध्यक्ष जयनारायण शाहको प्रमुख आतिथ्यमा सम्पन्न तालिम समापन कार्यक्रमलाई सम्बोधन गर्दै प्रमुख अतिथी शाहले तालिममा सिकेका कुराको कार्यान्वयन पक्ष उपलव्धीमूलक हुनुपर्नेमा जोड दिएका छन् । गणकहरुले ग्रामिण क्षेत्रका सर्वसाधारण अशिक्षित घर परिवार र समुदायको समेत तथ्याङक संकलन गर्न छुटाउँन नहुने भन्दै गणकहरुलाई विशेष सचेत गराइएको थियो ।
झापा गाउँपालिकाका प्रमुख प्रशासकीय अधिकृत एवम् स्थानीय जनगणना सहजीकरण समिति झापा गाउँपालिकाका संयोजक खेमराज थापाको अध्यक्षता तथा कनकाई नगरपालिकाका प्रमुख राजेन्द्र पोखरेलको प्रमुख आतिथ्यमा वुधवार उद्घाटन भएको तालिम कार्यक्रमको शनिवार समापन भएको हो ।
स्थानीय जनगणना अधिकृत प्रेम न्यौपानेले संचालन गरेको समापन कार्यक्रममा कनकाई नगरपालिकाकी उपप्रमुख मन्जु प्रसाईँ, रोटरी क्लव अफ सुरुङ्गाका अध्यक्ष शुसिलकुमार श्रेष्ठ, कनकाई बहुमुखी क्याम्पस सुरुङ्गाका क्याम्पस प्रमुख विकास उप्रेती लगायतले शुभकामना मन्तव्य राख्दै तालिमबाट प्राप्त ज्ञान र जानकारीको भरपुर प्रयोग गरी राष्ट्रिय महाअभियानलाई सार्थक पार्न सबैमा अनुरोध गरेका थिए ।
