कनकाई खबर \ हावाहुरीसहित केहि दिन अघि आएको अविरल वर्षाका कारण कृषिमा भएको क्षतिको मुल्याङ्कन गरी बाढिपिडितलाई तत्काल राहतको व्यवस्थापन गर्न माग गर्दै नेपाली काँग्रेस कनकाई नगर समितिले कनकाई नगरपालिकाका प्रमुख राजेन्द्र पोखरेललाई ज्ञापन–पत्र बुझाएको छ ।
वर्षभरी खाने अन्नवालीलाई भित्र्याउने वेलामा हावाहुरीसहित आएको ठूलो वर्षाले धानवाली नष्ट हुन पुगेका कारण पिडित किसानहरुलाई राहत दिनु पर्ने माग राख्दै नेपाली कांग्रेस कनकाईले ज्ञापन पत्र बुझाएको हो । नेपाली कांग्रेसका नगर सभापती दुर्गाप्रसाद प्रसाईँले ज्ञापन पत्रमा भएका मागहरु पूरा गर्न कनकाई नगरपालिकाले तत्काल लाग्नु पर्नेमा जोड दिए ।
ज्ञापनपत्र नगर सचिव रेणुप्रसाद कडेलले वाचन गरेका थिए । उपसभापतीद्वय सुर्य कुमार थापा र सन्तोष रायमाझी, वडा सभापतीहरु मनोज बस्नेत, बुद्घिमान बोहोरा, ईश्वरीप्रसाद शिवाकोटी, क्षेत्रीय प्रतिनिधिहरु लीलाबहादुर कटुवाल, मनोज कुमार पोखरेल, नारद गिरी, दावा शेर्पा, नगर सदस्य दिपक ओली लगायतको उपस्थितिमा ज्ञापन पत्र बुझाइएको हो ।
ज्ञापन–पत्र ग्रहण गर्दै नगर प्रमुख पोखरेलले सहभागी सबैलाई धन्यवाद व्यक्त गर्दै नेपाली काँग्रेस जस्तो प्रजातान्त्रिक तथा प्रमुख प्रतिपक्षी पार्टीले दिएको ज्ञापन पत्रलाई एउटा सुझाव एवम् सचिने अवसरका रुपमा लिने प्रतिवद्घता व्यक्त गरे । कनकाई नगरको विकास एवम् समृद्धिकालागि नेपाली काँग्रेसको महत्वपूर्ण भूमिका रहने भन्दै नगर प्रमुख पोखरेलले आगामी दिनमा सदैव सहकार्य र सामूहिक बहस पछिको निस्कर्षवाट मात्र अगाडी बढ्ने कुराको प्रतिवद्धता जनाएकाछन् ।
नेपाली काँग्रेसले कनकाईनगर क्षेत्र भित्रका कृषकहरुको क्षतिको वर्गिकरण गरी विकराल परिस्थितिमा रहेका किसानहरुका लागि तत्काल राहत तथा अन्य सहयोगको आवश्यकतालाई लक्षित गर्दै ६ बँुदे माग प्रस्तुत गरेको नगर सभापति प्रसाईँले जानकारी दिए ।
