कनकाई खबर \ हावाहुरीसँगै केहिदिनदेखि निरन्तर रुपमा आएको बर्षा र भेलबाडीका कारण किसानको धानबालीमा भएको क्षतीका विषयमा कनकाई नगरपालिकाले आज विहिबारदेखि तथ्याङ्क संकलन शुरु गर्ने भएको छ ।
आइतवारदेखि लगातार भएको बर्षा र हावाहुरीले कनकाई नगरपालिका क्षेत्रका ९ वटै वडामा किसानले लगाएको धानबालीमा क्षती पुर्याएको बताइएको छ । यस विषयमा नगरपालिकाको गम्भिर ध्यानाकर्षण भएको भन्दै बुधबार बसेको नगरस्तरीय कृषि उपसमितिको बैठकले तत्काल सवै वडाको अनुगमन गरी क्षतीको तथ्याङ्क संकलन शुरु गर्ने निर्णय भएको कृषि उपसमितिका संयोजक देवेन्द्र दर्नालले बताए ।
किसानले काटेर खेतमा सुकाएको धान अत्याधिक बर्षाका कारण डुवानमा परेको छ भने पाक्न लागेको धान हावाहुरीले लडाएर क्षती पुगेको छ । नगर स्तरीय कृषि उपसमितिले किसानहरूलाई सम्बन्धित वडाका प्राविधिकहरूसँग सम्पर्क गरेर क्षतीको यथार्थ विवरण यथासिघ्र वडा कार्यालय मार्फत कृषि उपसमितिमा पेश गर्न अनुरोध गर्ने निर्णय गरेको बताइएको छ ।
कनकाई नगरपालिकाका प्रवक्ता एवम् वडा नं। ४ का वडाअध्यक्ष गोविन्द पौडेलले सामाजिक संजाल मार्फत किसानको मुखमा आउन लागेको धानबालीको क्षतीका बारेमा कृषि शाखा र वडा कार्यालयको अवलोकन र सिफारिसमा क्षतीपुर्तिको व्यवस्था गर्न सम्बन्धित निकायको ध्यानाकर्षण गराएका थिए । सोही अनुरुप तत्काल स्थानीय तहको सम्बन्धित निकायबाट पहल शुरु गरिएको बताइएको छ । हावाहुरीसहित आएको बेमौसमी बर्षाका कारण झापामा करिव ४५ हजार हेक्टर क्षेत्रफलको धानबालीमा क्षति पुगेको बताइएको छ ।
कृषि ज्ञान केन्द्र झापाका प्रमुख नीलकमल सिंहले दिएको जानकारी अनुसार झापामा यस पटक ८७ हजार ५ सय हेक्टर जमिनमा धान रोपाईँ भएको थियो । धान रोपाईँका बेला समयमै पानी आएका कारण अधिकांश किसानहरुले बेलैमा धान रोपेका थिए । जसका कारण यसपटकको धानबाली फस्टाएर आएको बताउँदै कृषि ज्ञान केन्द्रका प्रमुख सिंहले हाल आएको हावाहुरीसहितको भारी वर्षाका कारण भने झापामा ५० प्रतिशत धानबाली पूर्ण रुपमा भुँइमा ढलेर पानीमा डुबेको बताए ।
जसका कारण धानबालीलाई ठूलो क्षती पुगेको भन्दै ज्ञान केन्द्रका प्रमुख सिंहले काटेको वा पाक्न लागेको धानबाली ढलेकै भएपनि पानीको निकास हुन सकेमा केही सुरक्षित हुन सक्ने जानकारी दिए ।
कनकाई खबरसँगको फोनसम्पर्कमा कृषि ज्ञान केन्द्र झापाका प्रमुख सिंहले तत्काललाई ढलेको वा काटेको धानबालीमा जमेको पानीलाई निकास दिन सकेमा ठूलो क्षति नहुने बताएका छन् । कृषि ज्ञान केन्द्र झापाले जिल्लाका सबै पालिकाहरुलाई धानबालीमा भएको क्षतीका बारेमा विवरण पठाउँन सर्कुलर जारी गरिसकेको जनाएको छ ।
