सुरुङ्गा \ बौद्ध धर्मावलम्वीहरुको ठूलो चाड ल्होछार पर्वमा समेत सरकारले सार्वजनिक विदा नदिएको भन्दै नेपाल तामाङ् घेदुङ् कनकाई नगरसमितिले सरकारले गरेको निर्णयप्रति दुःख व्यक्त गरेको छ ।
कनकाई धाम कोटीहोमस्थित साङाक छ्योइलीङ वौद्ध गुम्वामा मंगलवार आयोजीत २८५५ औं सोनाम ल्होछार फाग ल्हो कार्यक्रममा वोल्दै नेपाल तामाङ् घेदुङ्का अगुवाहरुले सरकारप्रति खेद प्रकट गरेका हुन् । नेपाल तामाङ् घेदुङ् कनकाई नगर समितिका अध्यक्ष विष्णुकुमार योञ्जन तामाङ्को सभापतित्व एवम् कनकाई नगरपालिकाका प्रमुख राजेन्द्रकुमार पोखरेलको प्रमुख आतिथ्य रहेको कार्यक्रममा विविध सांस्कृतिक नृत्यसहितको विशेष प्रस्तुती रहेको वताइएको छ ।
कार्यक्रमलाई सम्वोधन गर्दै नगर प्रमुख पोखरेलले नेपाल अन्य देशको तुलनामा सानो भएपनि हरेक देशवासीहरु विचमा भावनात्मक रुपमा सवै जातजातीहरु विचमा एकता रहेको वताएका छन् । कनकाई नगरपालिकामा भएको अभिलेखका आधारमा विभिन्न १२ वटा जातजातीहरुको तथ्याङ्क रहेको प्रष्ट पार्दै नगर प्रमुख पोखरेलले प्रत्येक जातजातीहरुको आ आफ्नै संस्कृति र संस्कार झल्कने किसिमको कार्यक्रम नगरपालिकाले गर्दै आएको वताएका छन् । समाजको समृद्धिका लागि हरेक जातजातीहरुले एकताका साथ सवै किसिमका चाडपर्वहरुलाई आफ्नै रुपमा लिनु पर्नेमा नगर प्रमुख पोखरेलले जोड दिएका छन् ।
गुम्वाका पुर्व अध्यक्ष धनवहादुर गोलेको स्वागत मन्तव्य साथै नगर सचिव बद्री घिसिङ्ले संचालन गरेको कार्यक्रममा नेपाल तामाङ् घेदुङ्का पूर्व केन्द्रिय सदस्य हेमा योञ्जन, जिल्ला साँस्कृतिक घेदुङ्का उपाध्यक्ष कृष्ण योञ्जन, किराँत राई यायोख्खा कनकाई नगरका सदस्य हाङविर कुलुङ् राई, कुमाल समाजका चन्द्र कुमाल लगायतले मन्तव्य राखेको घेदुङ् नगर समितिका सदस्य अजय तामाङ्(वाइवा) ले जानकारी दिएका छन् ।
