कनकाई खबर \ नेकपा एमाले कनकाई नगर कमिटिले कार्यकर्ताहरुको व्यापक उपस्थितीमा चाडपर्व विशेष शुभकामना आदानप्रदान कार्यक्रम संचालन गर्ने भएको छ ।
यहि असोज २३ गते शनिवारका दिन कनकाई २ स्थित पूर्वकै गहनाका रुपमा रहेको जामुनखाडी सिमसार तथा पर्यटकीय क्षेत्रमा संचालन हुने कार्यक्रमलाई नेकपा एमालेका केन्द्रिय सचिव गोकर्ण विष्टले सम्बोधन गर्ने भएका छन् । वडादशैं, दिपावली, छठ तथा उद्यौली उभौली पर्वको शुभअवसरमा कार्यकर्ता भेटघाट तथा शुभकामना आदानप्रदान कार्यक्रम संचालन गर्न लागिएको नेकपा एमाले नगर कमिटीका अध्यक्ष रविन्द्र लम्सालले जानकारी दिएका छन् । कार्यक्रममा राष्ट्रियस्तरका कलाकारसहितको विविध साँस्कृतिक प्रस्तुतीहरु रहने बताइएको छ ।
यसलाई थप व्यवस्थित गर्न कनकाई नगर क्षेत्रका सामाजिक अभियन्ता श्यामसुन्दर ओलीको संयोजकत्वमा ७ सदस्यीय कार्यक्रम व्यवस्थापन उपसमिति गठन गरिएको छ । समितिको सदस्यहरुमा राजेन्द्र उप्रेती, प्रेमप्रसाद अधिकारी, अमरबहादुर कार्की, सीता अधिकारी, मनमाया तामाङ् र राधिका ओली कडरीया रहेको बताइएको छ । कार्यक्रममा नगर क्षेत्रका विभिन्न तहमा रहेका नेता तथा कार्यकर्ताहरुलाई सक्रिय सहभागिताकालागि नगर कमिटीले अनुरोध गरेको छ ।
