कनकाई खबर \ कनकाई नगरपालिकाले नगर क्षेत्रका बजारको अनुगमनलाई तिव्रता दिएको छ ।
चाडपर्व नजिक आउँदै गरेको अवस्थामा खाद्य सामाग्री लगायत विविध पक्षमा अनियमितता नहोस् भन्ने उद्येश्यका साथ अनुगमनलाई तिव्रता दिन थालिएको कनकाई नगरपालिकाकी उपप्रमुख मन्जु प्रसाईँले बताएकी छन् । उपप्रमुख प्रसाईँको नेतृत्वमा कनकाई नगरपालिकाका प्रमुख प्रशासकीय अधिकृत मोहनप्रसाद न्यौपाने, आलेप अधिकृत कृष्णप्रसाद रिमाल, उमानाथ ढकाल लगायतका नगरपालिकाका कर्मचारीहरु, सम्बन्धित वडाका जनप्रतिनिधि, संचारकर्मी, सुरक्षाकर्मी सहितको सहभागीतामा नगर क्षेत्रका दुर्गापुर, लक्ष्मीपुर, घैलाडुवा बजार क्षेत्र अनुगमन गरिएको हो ।
बजार अनुगमनका क्रममा वजार क्षेत्रका धेरै पसलहरुमा मूल्य सूचि नराखेको पाइएको छ । व्यवसाय दर्ता, नवीकरण, नगरपालिकाको दर्ता नविकरण नभएकालाई सो सम्बन्धी व्यवस्था मिलाउँन सुझाव दिइएको बताइएको छ । बजार क्षेत्रका व्यपारीहरुले डिजिटल नापतौलको प्रमाण पत्र नलिइएको साथै प्याकेजीङ् कम्पनीले उत्पादनसँग सम्बन्धित विषय नखुलाएको पाइएकाले सो विषयमा व्यवसायीहरुको ध्यानाकर्षण गराइएको उपप्रमुख प्रसाईँले जानकारी दिएकी छन् ।
बजार क्षेत्रमा रहेका व्युटीपार्लर, कसमेटिक पसलहरुमा प्रयोग हुने श्रृङ्गारका सामाग्रीहरु र खाद्य सामाग्रीका पसलहरुमा म्याद गुज्रिएका सामान छ्याप छ्याप्ती भेटिएकाले अनुगमनका क्रममा बराबद भएका त्यस्ता सामाग्रीहरु नष्ट गरिएको नगरपालिकाका प्रमुख प्रशासकीय अधिकृत मोहनप्रसाद न्यौपानेले बताएका छन् । व्यपारीहरुले सामान खरिद गरेको र ग्राहकलाई दिने बिल चुस्त दुरुस्त नभएको पाइएको छ । मासु व्यवसायीहरुले थप सरसफाईमा ख्याल राख्नुपर्ने अवस्था देखिएको साथै यस अघि अनुगमनका क्रममा व्यवसायीहरुलाई दिएको निर्देशन सामान्य पालना भएकाले केही सुधार भएको देखिएको उपप्रमुख प्रसाईँले बताएकी छन् ।थप चुस्त दुरुस्त रहनकालागि व्यवसायीहरुलाई सुझाव दिँदै आवश्यक्ताअनुसार कागज गराएर छाडिएको बताइएको छ ।
