कनकाई खबर \ नेपाली कांग्रेसको १४ औं महाधिवेशनबाट झापाका १५ वटै पालिकाको नेतृत्व सार्वजनिक भएको छ । पालिकाको नेतृत्वकालागि भएको कांग्रेस अधिवेशनमा दुई पक्षिय प्रतिष्पर्धा भएको थियो भने केही पालिकामा सर्वसम्मत नेतृत्व चयन भएको बताइएको छ ।
कनकाई कांग्रेसको निर्वाचनमा दुर्गा प्रसाईको प्यानलै अत्याधिक मतका साथ बिजयी भएको छ । निवर्तमान नगर सचिव समेत रहेका प्रसाईँले आफ्ना प्रतिस्पर्धीका रुपमा रहेका सेवा निवृत्त शिक्षक प्रल्हाद घिमिरेलाई ७९ मतको अन्तरले पाखा लगाउँदै कनकाई नगर सभापतिमा निर्वाचित भएका हुन् ।
आज भएको निर्वाचनमा जम्मा १ सय ८३ मत खसेकोमा सभापतिका बिजयी उम्मेद्धार प्रसाईले १ सय २९ मत प्राप्त गरेका थिए भने उनका प्रतिस्पर्धी प्रल्हाद घिमिरेले ५० मत मात्रै ल्याउन सफल भएका छन् । उपसभापतिमा समेत प्रसाई प्यानलकै सन्तोष रायमाझिले १४२ मत र सुर्य थापाले ११७ मत ल्याएर बिजयी भएका छन् । उपसभापतिमा घिमिरे प्यानलका नविन बस्नेतले ४९ र तेजबहादुर गिरीले ३४ मत मात्रै प्राप्त गरे । सचिव पदमा समेत प्रसाई प्यानलकै रेणुप्रसाद कडेँलले १२३ र दिपक खतिवडाले १०५ मतका साथ बिजयी भएका छन् । घिमिरे प्यानलका सचिव पदका उम्मेद्धार अर्जुन बोहोराले ७३ र हरि फुयाँलले ४६ मत प्राप्त गर्न सफल भएको निर्वाचन समितिले जनाएको छ । सहसचिवमा समेत प्रसाईँ प्यानलका उदित दहालले १३७ मत र धर्म राजवंशीले १२५ मतका साथ बिजयी भएका थिए भने घिमिरे प्यानलका डम्बर घिमिरेले ६३ मत प्राप्त गरे ।
झापामा भएको पालिकास्तरीय अधिवेशनबाट कचनकवल, बुद्धशान्ति , हल्दिबारी र झापा गाउँपालिकामा निर्विरोध समिति चयन भएकोे थियो भने बाँकी पालिकामा निर्वाचनबाट पदाधिकारीको टुङ्गो लागेको हो । कचनकवलमा तुलाराम अधिकारी, हल्दिबारीमा गंगा प्रसाईं, झापा गाउँपालिकामा सागीरथ गणेश, बुद्धशान्ति गाउँपालिकामा चक्र शेर्माको नेतृत्वमा कार्यसमिति सर्वसम्मत रुपमा निर्वाचित भएको छ ।
यसैगरी विर्तामोडको सभापतिमा भोजराज सिटौला, अर्जुनधारामा हेमराज खरेल, मेची नगरमा सुवेशकुमार पनेरु, शिवसताक्षीमा अशोक बस्नेत, दमकमा प्रकाश प्रसाईँ, गौरादहमा यादब सेड्याईँ, भद्रपुरमा राम कडेँल, बाह्रदशीमा ईन्द्र बस्नेत, कमलमा वुद्धिराज न्यौपाने, गौरीगञ्जमा आग्नुुप्रसाद राजवंशी निर्वाचित भएको बताइएको छ ।
