कनकाई खबर / नेकपा एमाले कनकाई नगर कमिटिले संविधान दिवसको अवसर पारेर कार्यकर्ता भेटघाट तथा प्रशिक्षण सहितको सांस्कृतिक कार्यक्रम सम्पन्न गरेको छ ।
सांस्कृतिक कार्यक्रममा केन्द्रिय स्तरका नेतादेखि टोलस्तरका कार्यकर्ताहरु समेत एउटै स्टेजमा छमछमी नाचेको देख्दा धनुषकोटी पर्यटकीय वनभोज स्थल समेत रमाइरहे झैं देखिन्थ्यो । कार्यक्रम स्थलको संगीतमय वातावरणले उपस्थित सबैलाई भरपुर मनोरञ्जन दिएको कार्यक्रम व्यवस्थापन समितिका संयोजक राजेन्द्र उप्रेती बताउँछन् । कोरोना कहरका विच लामो समय सम्म लकडाउन भएका कारण मानसिक रुपमा विचलन भएका पार्टीका नेता तथा कार्यकर्ताहरुलाई एकआपसमा भेटघाटको वातावरण सहज बनाउँने उद्येश्यका साथ पर्यटकीय क्षेत्र धनुषकोटी परिसरमा कार्यक्रमको आयोजना गरिएको बताइएको छ ।
कार्यक्रमका प्रमुख अतिथी माननीय हिराकुमार थापा, संविधान सभा सदस्यद्वय प्रेम गिरी र अम्बिका राजवंशी, कनकाई नगरपालिकाकी उपप्रमुख मन्जु प्रसाईँ, वडाअध्यक्षहरु साथै कनकाई नगरपालिकाका कार्यपालिका सदस्यहरु लगायत अन्य जनप्रतिनिधिसहित पार्टीका विभिन्न तहका नेता तथा कार्यकर्ताले स्टेजमा छमछमी नाचेर माहोल तताएका थिए ।
कार्यक्रमकै अवसरमा प्रदेश सभा सदस्य माननीय हिराकुमार थापा प्रदेशको नवगठित सरकारमा भूमी व्यवस्था, कृषि तथा सहकारी मन्त्री नियुक्त हुन सफल भएको खुशियालीमा विशेष स्वागत सम्मान गरिएको छ । कनकाई नगरबाट मन्त्री बन्न सफल माननीय थापालाई झापा क्षेत्र नं. ४ का संघीय सांसद एलपी साँवा लिम्बू, संविधान सभा सदस्य अम्बिका राजवंशी, कनकाई नगरपालिकाका प्रमुख राजेन्द्र पोखरेल, उपप्रमुख मन्जु प्रसाइँ, निर्वाचित जनप्रतिनिधीहरु, पार्टीको सिंगो नगर कमिटी लगायत सहभागी पार्टीका विभिन्न तहमा रहेका नेता तथा कार्यकर्ताहरुले स्वागत सम्मान गरेका थिए ।
नेकपा एमाले कनकाई नगर कमिटीका अध्यक्ष रविन्द्र लम्सालको सभापतित्व एवम् कार्यक्रम व्यवस्थापन समिति सदस्य सीता बस्नेतले स्वागत गरेको कार्यक्रमलाई सम्बोधन गर्दै मन्त्री थापाले वर्तमान संविधानले महिला पुरुषमा एकता साथै समानता कायम गरेको बताए । महिलाहरुका निम्ति वर्तमान संविधानले सम्बोधन गरेकै कारण हरेक स्थानीय तहमा समेत महिलाहरुको उल्लेख्य सहभागिता रहेको भन्दै मन्त्री थापाले आफ्नो हकअधिकार सुनिश्चित गर्न अब हरेक महिलाहरु सक्षम रहेको बताएका छन् ।
त्यस्तै संघीय सांसद एलपी साँवा लिम्बूूले सिंगो नेपाल राष्ट्रको सुखी नेपाली समृद्ध नेपाल अभियान सफल पार्ने कार्यमा नेकपा एमाले प्रतिवद्ध रहेको भन्दै पाटी फुटेको भन्ने कसैलाई भ्रम छ भने यसको पछि नलाग्न कार्यकर्तालाई सुझाव दिएका छन् । कुर्सी मोहको राजनीतिमा लागेका कुनै अवसरवादी व्यक्तिले पार्टी छोड्दैमा यसको कुनै असर नपर्ने भन्दै सांसद साँवाले कार्यकर्तालाई भ्रममा नपर्न सुझाव दिए । मुलुकलाई रुपान्तरण गर्दै आर्थिक समृद्धिको यात्रामा अघि बढाउँने महान अभियानको अभियन्ता पार्टी अध्यक्ष के.पी.ओलीले नेतृत्व गरेको पार्टी नेकपा एमालेप्रति जनताको विश्वास जागेकै कारण अहिले पनि विभिन्न पार्टी परित्याग गरेर एमालेमा प्रवेशको लहर बढेको भन्दै सांसद साँवाले नेकपा एमालेको अबको भविष्य सुनिश्चित भएको बताए ।
संविधान सभा सदस्य अम्बिका राजवंशीले महिलाहरुका निम्ति वर्तमान संविधानले आवश्यक्ता अनुसार स्थान दिएको प्रष्ट पार्दै आफ्नो अधिकारको सदुपयोग गर्न सम्बन्धित सबैलाई अनुरोध गरेकी छन् । सबै जातजाती, वर्ग र समुदायकालागि हित हुने गरीको अहिले सम्मकै नेपालको उत्कृष्ट संविधान भएको बताउँदै संविधान सभा सदस्य राजवंशीले समाजमा महिला पुरुष एकै रथको दुई पाङ्ग्रा झै सहयात्री बनेर हिँड्नुको कुनै विकल्प नरहेको बताएकी छन् ।
कार्यक्रम संयोजक राजेन्द्र उप्रेतीले औचित्यमाथि प्रकाश पारेको कार्यक्रममा कनकाई नगरपालिकाका प्रमुुख राजेन्द्र पोखरेलले विकृति विसंगतिलाई न्युनिकरण गर्दै सामाजिक एकताका साथ अघि बढ्न सकेमा मात्र सामाजिक रुपान्तरण हुन सक्नेमा जोड दिएका छन् । कार्यक्रमको संचालन नेकपा एमाले कनकाईका सचिव विनोद रानामगरले गरेका थिए ।
