कनकाई खबर \ संविधान दिवसको अवसर पारेर नेकपा एमाले कनकाई नगर कमिटिले प्रशिक्षणसहितको विविध सांस्कृतिक कार्यक्रम संचालन गर्ने भएको छ ।
कार्यक्रमकै अवसरमा नगर कमिटिले प्रदेश १ सरकारमा झापा निर्वाचन क्षेत्र नं.४ (ख) का प्रदेश सभा सदस्य माननीय हिराकुमार थापा प्रदेशको नवगठित सरकारमा भूमी व्यवस्था, कृषि तथा सहकारी मन्त्री नियुक्त हुन सफल भएको खुशियालीमा विशेष कार्यक्रम संचालन गर्न लागेको बताइएको छ । कनकाई नगरबाट मन्त्री बन्न सफल माननीय हिराकुमार थापालाई कार्यक्रमका अवसरमा कनकाई नगरवासीसहित झापा क्षेत्र नं.४ का नागरिकहरुबाट विशेष स्वागत सम्मान गर्ने कार्यक्रम रहेको बुझिएको छ ।
धार्मिक तथा पर्यटकीय क्षेत्र कनकाईको धनुषकोटी वनभोज स्थलमा भोली असोज ३ गते आइतबारकालागि तय गरिएको कार्यक्रममा पार्टीको केन्द्र, प्रदेश, जिल्ला साथै क्षेत्र र स्थानीय स्तरका नेता तथा कार्यकर्ताहरुको व्यापक उपस्थिती रहने बताइएको छ । वृहत कार्यकर्ता भेलासहितको प्रशिक्षण कार्यक्रम व्यवस्थापनकालागि स्थानीय सक्रिय युवा राजेन्द्र उप्रेतीको संयोजकत्वमा गठन भएको नौ सदस्यीय समितिले कनकाई नगरका सबै वडाहरुसँग समन्वय गरीरहेको बताइएको छ ।
कनकाई नगरका ग्रामिण क्षेत्रबाट आउँने पार्टीका कार्यकर्ताहरुलाई आवतजावतमा समस्या नहोस् भन्ने उद्येश्यले व्यवस्थापन समितिका तर्फबाट यातायातको समेत व्यवस्था गरिएको जानकारी दिँदै समितिका संयोजक उप्रेतीले पार्टीका सम्पूर्ण सदस्यहरुलाई कार्यक्रममा उपस्थितीकालागि अनुरोध गरेका छन् ।
दिनको ठीक ११ बजेदेखि कार्यक्रम संचालन हुने भएकाले पार्टीको प्रत्येक वडा कमिटिले आफ्नो वडामा यातायातको निश्चित समयसिमा निर्धारण गरेर पार्टीका कार्यकर्ताहरुलाई कार्यक्रम स्थलसम्म आउँने व्यवस्था मिलाउँन नेकपा एमाले कनकाई नगर कमिटिका अध्यक्ष रविन्द्र लम्सालले सम्बन्धित सबैलाई अनुरोध गरेका छन् । पार्टी अध्यक्ष लम्सालले उपस्थित सबैलाई स्वास्थ्य सुरक्षाको मापदण्ड अपनाउँदै मास्क अनिवार्य प्रयोग गरिदिन समेत अनुरोध गरेका छन् ।
