कनकाई खबर / नेपाली काँग्रेसको १४ औं महाधिवेशन अन्र्तगत हुने निर्वाचनका लागि झापा सभापतिमा देउमान थेवेले उम्मेद्वारी घोषणा गरेका छन् ।
थेवेले बिर्तामोडमा पत्रकार भेटघाटका क्रममा सभापतिमा आफ्नो उम्मेद्वारी रहने बताएका हुन् । नेपाली काँग्रेस झापाको असोज १० गते हुने निर्वाचनका लागि थेवेले उम्मेद्वारी दिने घोषणा गरेका हुन् ।
पार्टीको १३औं महाधिवेशनमा सहमति र सहकार्य गरेको जिकिर गर्दै उनले उम्मेद्वारी दिने निर्णय गरेको बताए । उनले नेता कृष्ण सिटौला, विश्वप्रकाश शर्मा, केशव बुढाथोकी, उद्धव थापा लगायत सवैको सल्लाह सुझाव अनुसार नै आफ्नो उम्मेद्वारी रहेको बताएका छन् । ‘उम्मेद्वारी घोषणाका विधिविधान होलान् सभापति थेवेले भने, १३औं महाधिवेशनमा भएको सल्लाह र सहमति अनुसार नै मैले उम्मेद्वारी घोषणा गरेको हुँ ।’
अर्का सभापतिका उम्मेद्वार राम कट्टेलको चर्चा गर्दै थेवेले चुनावसम्ममा सहमति र सहकार्य हुनेमा आँफू विस्वस्त रहेको जानकारी दिए । उनले झापाका १५ वटै स्थानीय तहमा भदौ २७ गते हुने निर्वाचन पनि सर्वसम्मत गर्ने प्रयास जारी रहेको बताउँदै झापा गाउँपालिकामा सर्वसम्मत हुने प्रक्रिया पूरा भइसकेको बताए । कनकाई नगरमा पनि सर्वसम्मत नेतृत्व चयन हुने विश्वास थेवेले ब्यक्त गरे । उनले यसअघि झापाका १ सय ३१ वडा मध्ये ६४ वडामा सर्वसम्मत नेतृत्व चयन भएको जिकिर गर्दै अन्य वडामा पनि धेरै पदमा सर्वसम्मत भएको बताए ।
स्पष्ट बक्ताका रुपमा परिचित सामाजिक अभियन्ता थेवेले नेपाली कांग्रेस झापा उपसभापतिको जिम्मेवारी समेत सफलतापुर्वक सम्हाली सकेका हुन् ।
