कनकाई खबर / झापाको विर्तामोडमा केन्द्रिय कार्यालय रहेको कर्णाली वचत तथा ऋण सहकारी संस्थाले शुक्रबार एक कार्यक्रमका विच दुर्घटनामा ज्यान गुमाएका आफ्ना सदस्यका परिवारलाई राहत रकम हस्तान्तरण गरेको छ ।
संस्थाको सुरुङ्गा सेवा केन्द्र अन्तर्गत रहेर कारोवार गर्दै आएका शेयर सदस्य पूर्णबहादुर विष्ट र उनकी पत्नी भीमा विष्टको डेढ महिनाअघि दमकको चियाबगानमा भएको सडक दुर्घटनामा परी घटनास्थलमै मृत्यु भएपछि संस्थाले विष्ट दम्पतीको परिवारलाई राहत रकम हस्तान्तरण गरेको सुरुङ्गा सेवा केन्द्रका प्रमुख ईन्द्रबहादुर कार्कीले बताए ।
सुरुङ्गास्थित होटल डिलाइटको सभाहलमा भएको कार्यक्रममा प्रमुख अतिथि कनकाई नगरपालिकाकी उपप्रमुख मञ्जु प्रसाईंले विमा बापतको रकम ४ लाख र उपचार सहयोग वापतको ८० हजार गरी ४ लाख ८० हजार बराबरको चेक दिवंगत दम्पतीका छोरा निशान विष्टलाई हस्तान्तरण गरिएको हो ।
कर्णालीले विष्ट दम्पतीको निधन भएको ४५ औं दिनको पुण्यतिथिको अवसर पारेर संस्थाको सामाजिक उत्तरदायित्व अन्तर्गत परिवारलाई राहत रकम हस्तान्तरण गरिएको संस्थाका अध्यक्ष टीएस प्रधानले बताए ।
संस्थाको सुरुङ्गा सेवा केन्द्र अन्तर्गत व्यवस्थापन उपसमितिका संयोजक चन्द्रप्रसाद भेट्वालको सभापतित्व रहेको कार्यक्रममा संस्थाका उपाध्यक्ष ईश्वरीप्रसाद खरेलले कार्यक्रमको औचित्यमाथि प्रकाश पारेका थिए । शिक्षा उपसमितिका सदस्य देवी थापाले सञ्चालन गरेको कार्यक्रममा सुरुंगा सेवाकेन्द्रकी उपसमिति सदस्य शान्ताकुमारी अधिकारीले स्वागत गरेकी थिइन् ।
कार्यक्रममा जेष्ठ नागरिक संघ कनकाईका अध्यक्ष पुण्यप्रसाद बाराकोटी, सामाजिक व्यक्तित्वहरु रविन्द्र लम्साल, ख्याम ओली, विष्णु विमली लगायतले दिवंगत विष्ट दम्पतीको मेहनत र परिश्रमको खुुलेर चर्चा गर्दै सन्तानको उज्वल भविष्यका लागि स्थानीय सरकार, विभिन्न सामाजिक संघसंस्था र समुदायले मिलेर सहयोग गर्नुपर्ने बताए ।
सोही अवसरमा मृगौलापीडित शेयर सदस्य कमलबहादुर कार्कीलाई १० हजार उपचार खर्च र कोरोनाका कारण ज्यान गुमाएका शेयर सदस्य प्रकाशकुमार राई र उनकी श्रीमती सपना लिम्बूको परिवारलाई पनि नगद १२ हजार रकम उपलब्ध गराएको बताइएको छ ।
कर्णालीले सदैव सदस्यकेन्द्रित कार्यक्रमहरु ल्याउने गरेको बताउँदै संस्थाका सचिव भूपाल वस्नेतले सदस्य तथा तिनको परिवारको स्वास्थ्य र शिक्षाका लागि यसै वर्षदेखि थप सुविधाका कार्यक्रमहरु सञ्चालनमा ल्याइएको जानकारी दिए ।
