कनकाई खबर \ नेकपा एमालेको भातृ संगठन राष्ट्रिय युवा संघ नेपाल कनकाई नगर कमिटीले मानवीय सेवालाई अभियानका रुपमा निरन्तरता दिएको छ ।
कोरोना महामारीको यो संकटकालिन समयमा विहान बेलुका हातमुख जोड्न नै समस्यामा परेका विपन्न वर्ग र समुदायको पहिचान गरी युवा संघले थोरै भएपनि सहयोग गर्ने कार्यलाई अभियानका रुपमा अघि बढाएको युवा संघ कनकाईका अध्यक्ष विश्वविजय खरेलले बताएका छन् । विपन्न वर्ग र समुदायको पहिचान गरी न्युनतम आधारभुत आवश्यक्ता पुर्तिकालागि सरकारको ध्यान केन्द्रित होस् भन्ने उद्येश्यले समेत सांकेतिक रुपमा युवा संघले अभियान संचाालन गरेको अध्यक्ष खरेल बताउँछन् ।
यसै क्रममा आज शनिवार कनकाई ७ स्थित टोल नं.१० का दुईवटा विपन्न सन्थाल परिवारमा युवा संघले खाद्य सामाग्री वितरण गरेको छ । युवा संघ कनकाईका अध्यक्ष विश्वविजय खरेल, संघका पूर्व अध्यक्ष एवम् नेकपा एमाले कनकाई नगर कमिटीका सचिव विनोद रानामगरसहित युवा संघका पदाधिकारीहरु विपन्न परिवारको निजी निवासमै गएर अतिआवश्यकीय खाद्य सामाग्री वितरण गरिएको युवा संघ कनकाईका सहसचिव दिलीप राईले जानकारी दिएका छन् । खाद्य सामाग्री पाएपछि शारिरीक रुपमा अशक्त समेत भएका विपन्न सन्थाल परिवारले खुशी व्यक्त गरेका थिए ।
खाद्य सामाग्री वितरण कार्यक्रममा जनप्रतिनिधीका तर्फबाट कनकाई ७ का वडा सदस्यद्वय प्रकाश शिवाकोटी र गिता चौहान साथै युवा संघ कनकाई ७ का सदस्य कृष्ण पाठकसहितको उपस्थिती रहेको बताइएको छ । मानवीय सेवाको माध्यमबाट सामाजिक एकता कायम राख्ने उद्येश्यका साथ युवा संघ नेपाल कनकाई नगर कमिटीले संचालन गरेको अभियानलाई निरन्तरता दिँदै जाने युवा संघ कनकाईका अध्यक्ष खरेलले कनकाई खबरलाई जानकारी दिएका छन् ।
