कनकाई खबर \ नेपाली कांग्रेसको १४औं महाधिवेशन अन्तर्गत यही भदौं १८ गते देशव्यापी हुने भनिएको वडा अधिवेशन झापामा १९ गते प्रारम्भ हुने भएको छ ।
निर्वाचनमा जानुुअघि नै कनकाई नगरका नौ वटै वडाका सभापतिहरु भने सर्वसम्मत हुने अवस्थामा पुगेको पार्टी स्रोतले जनाएको छ । यसै क्रममा कनकाई १ मा मनोज बस्नेत र टेकनाथ लुइटेलका विचमा सहमतिको वातावरण बनेको भएपनि आधिकारीक रुपमा घोषणा हुन भने बाँकी रहेको बताइएको छ । सर्वसम्मत भएपनि घोषणा हुन बाँकी रहेका वडाहरु मध्ये कनकाईको वडा नं.२ मा वुद्धिमान बोहोरा, वडा नं.५ मा याम फुयाल, वडा नं.६ मा रामगोपाल ओली, वडा नं.८ मा लक्ष्मणज्वयल श्रेष्ठ र वडा नं.९ मा मोहन राजवंशी रहेको बताइएको छ ।
निर्वाचन तालिका अनुुसार मतदाता नामावली प्रकाशन भदौ १९ गते १२ बजेदेखि २ बजेसम्म उम्मेद्वारी दर्ता, २ बजेदेखि २ः३० सम्म उम्मेद्वारमाथि दावी–विरोध, २ः३० देखि ५ बजेसम्म उम्मेद्वारी फिर्ता र ५ः३० बजे उम्मेद्वारको अन्तिम नामावली प्रकाशन हुने कार्यतालिका तय गरिएको झापाका लागि निर्वाचन अधिकृत सुवोधबाबु चिलवालले जानकारीदिए ।
सर्वसम्मत भएका वडाहरुमा १९ गते नै मतदान प्रक्रिया सम्पन्न हुनेछ भने सर्वसम्मत नभएका वडाहरुमा भदौ २० गते ९ बजेदेखि १ बजेसम्म मतदानको समय तय गरिएको छ । मतदान सकिएलगत्तै मतगणना र मतपरिणाम सार्वजनिक गर्ने निर्वाचन कार्यतालिका तय गरिएको छ । स्थानीय निर्वाचनलाई समेत लक्षित गरेर पार्टीलाई हाँक्न सक्ने सक्षम नेतृत्व चयनकालागि सक्रिय रहेका नेपाली कांग्रेसका नेता तथा कार्यकर्ताहरु यतिबेला जिल्लाका १३१ वटै वडामा रहेका आफ्ना मतदाताहरुसँग भेटघाटमा व्यस्त देखिन्छन् ।
झापामा केन्द्रिय स्तरका नेताहरु मध्ये कृष्ण सिटौलाको लाइन राम्रो बनेका कारण कनकाई नगरपालिका क्षेत्रमा समेत यसको प्रभाव परेको देखिन्छ । जसका कारण पनि पालिकाको नेतृत्वमा समेत यसले राम्रै प्रभाव पार्ने अनुमान गरिएको छ ।
पालिका, क्षेत्रीय र जिल्ला नेतृत्वमा जान चाहनेले पहिलो खुड्किलोको रुपमा रहेको वडाअधिवेशनमा उम्मेद्वार बन्नु पर्नेछ । नेपाली कांग्रेसका क्रियाशील सदस्यहरुले वडा अधिवेशनमा गरेको मतदानबाट वडा कमिटी र क्षेत्रीय प्रतिनिधि निर्वाचित हुने बताइएको छ ।
क्षेत्रीय प्रतिनिधिले पालिकाको नेतृत्व चयन गर्नेछन् । केन्द्रीय महाधिवेशनका लागि महाधिवेशन प्रतिनिधि चयन पनि क्षेत्रीय प्रतिनिधिबाटै हुने भएका छन् । वडाअधिवेशन समाप्त भएसँगै भदौ २७ गते गाउँ र नगर अधिवेशन गर्ने कार्यतालिका रहेको बताइएको छ ।
झापाको अधिवेशनका लागि केन्द्रबाट निर्वाचन अधिकृतको रुपमा आएका सुबोधबाबु चिलवालले सहमति, सहकार्य र एकता प्रदर्शन गर्दै झापाको निर्वाचन उदाहरणीय बनाउन सम्बन्धित सबैमा आग्रह गरेका छन् ।
चिलवालले निर्वाचनका लागि भएको प्रतिस्पर्धालाई गुटगत राजनीतिमा परिणत नगरी सङ्गठन बलियो बनाउने कार्यमा गम्भिर बन्न सम्बन्धित सबैलाई आग्रह गरेका छन् ।
