कनकाई खबर / उज्यालो नगरी बनाउँने अभियानको निरन्तरता स्वरुप झापाको कनकाई नगरपालिका ४ स्थित शान्तिटोलमा उज्यालो कार्यक्रम अन्तर्गत सडक बत्ती संचालनमा आएको छ ।
शान्ती टोल विकास संस्थाको अगुवाइमा टोलवासी तथा वडाको समेत गरी ८५ हजारको लागतमा साझेदारी कार्यक्रम अन्तर्गत शान्ती टोलभित्र ७५ वटा सडक बत्ती विस्तार भएको सोही टोल विकास संस्थाका संयोजक दुर्गाप्रसाद चापागाईँले जानकारी दिए । विस्तार भएका सडक बत्तीको एक कार्यक्रमका विच कनकाई नगरपालिकाका प्रवक्ता एवम् वडा नं. ४ का वडाअध्यक्ष गोविन्द पौडेल र टोलका बौद्धिक व्यक्तित्व डा.पुण्यप्रसाद सिग्देलबाट विद्युत मिटरको स्विच थिचेर उज्यालो कार्यक्रमको उद्घाटन गरिएको हो ।
दुईवटा विद्युत मिटरमध्ये वडाध्यक्ष पौडेल र बौद्धिक व्यक्तित्व डा.सिग्देलबाट मिटरको स्विच थिचेर शान्ती टोललाई उज्यालो टोलका रुपमा रूपान्तरण गरी कार्यक्रम विधिवत् रुपमा सम्पन्न गरिएको हो । उज्यालो कार्यक्रमबाट १ सय १५ टोलबासी प्रत्यक्ष लाभान्वीत भएको बताइएको छ ।
शान्ती टोल विकास संस्थाका अध्यक्ष दुर्गाप्रसाद चापागाईंको अध्यक्षता एवम् वडाअध्यक्ष गोविन्द पौडेलको प्रमुख आतिथ्य रहेको उद्घाटन कार्यक्रममा टोल विकास संस्थाको सम्पूर्ण गतिविधिका बारेमा संस्थाका अध्यक्ष चापागाईँले प्रष्ट पारेका थिए ।
टोल अन्तर्गतको उज्यालो कार्यक्रमका संयोजक अर्जुन सिटौलाले संचालन गरेको उद्घाटन कार्यक्रममा वडाध्यक्ष पौडेलले वडाको उज्यालो कार्यक्रमलाई बचाइराख्न वडाका तर्फबाट सक्दो सहयोगको प्रतिबद्धता व्यक्त गरे । कनकाई नगरपालिकालाई उज्यालो नगरी निर्माण गर्ने अभियानको निरन्तरता स्वरुप वडामा सडक बत्ती विस्तारको कार्यलाई तिव्रता दिइएको वडाअध्यक्ष पौडेलले बताएका छन् । संस्थाका कोषाध्यक्ष रामजी गौतमले स्वागत गरेको कार्यक्रममा टोलका बुद्धिजीवी खड्गप्रसाद विमलीले शुभकामना मन्तव्य राखेका थिए ।
