काठमाडौं \ नेकपा एमालेले पार्टी विभाजन गरेर (एकीकृत समाजवादी) गठनमा उभिएका नेताहरूलाई पार्टीबाट निष्कासन गरेको छ ।
बिहीबारको केन्द्रीय कमिटी बैठकले उनीहरूलाई पार्टीबाट निष्कासन गर्ने र अभिलेखबाटनाम हटाउन निवार्चन आयोगलाई जानकारी गराउने निर्णय भएको नेता प्रदीप ज्ञवालीले जानकारी दिएका छन् ।
ललितपुरको च्यासलस्थित तुल्सीलाल स्मृति प्रतिष्ठानमा बसेको नेकपा एमाले केन्द्रीय कमिटी बैठकले असोज मसान्तभित्र संगठित सदस्यता नविकरण गरिसक्ने निर्णय पनि गरेको छ ।
बैठकले भदौ १६ देखि २० गतेसम्म पार्टीमा देखापरेका समस्या समाधान गर्न र १० बुँदे भावनाअनुसार पार्टी चलायमान बनाउन जिल्ला भेला सम्पन्न गर्ने निर्णय गरेको ज्ञवालीले जनाए ।
भदौ २५ र २६ गते स्थायी कमिटीको र २७ र २८ गते केन्द्रीय कमिटीको बैठक बोलाउने निर्णयसमेत भएको उनले जानकारी दिए । त्यस्तै, बैठकले असोज ४, ५ र ६ गते विधान महाधिवेशन गर्ने निर्णय पनि गरेको छ ।
नेता ज्ञवालीका अनुसार बैठकले देशैभरका वडा अधिवेशन ६ कात्तिकमा र पालिकाहरूको अधिवेशन ९ कात्तिकभित्र गरिसक्ने निर्णय पनि गरेको छ । साथै, आजको बैठकबाट १० औँ राष्ट्रिय महाधिवेशन मंसिर १०, ११ र १२ गते काठमाडौंमा गर्ने स्थायी कमिटीको निर्णयलाई पनि पारित गरेको छ ।
