कनकाई खबर / कोरोना कहरका विच जारी निषेधाज्ञाको समयमा आज शुक्रबार बिहान ८ बजेदेखिको यो भिडभाड एनआईसी एशिया बैंक शाखा सुरुङ्गाको हो ।
यहाँको स्थानीय प्रशासन केही दिनदेखी विदाई र स्वागतका खादा ओढ्नमा व्यस्त देखिन्छ । जनप्रतिनिधिले बुढापाकालाई बैंकमा घुँइचो लगाइदिएका छन् ।
कनकाईको वडा नं.२ र ४ का सामाजिक सुरक्षा भत्ता प्राप्त गर्ने दुईवटा वडाका करिब एक हजार लाभग्राही महानुभावहरुलाई यस शाखाले आज शुक्रबार र शनिबारमा भत्ता दिइसक्नु पर्ने बाध्यता रहेको बैंकका शाखा प्रमुख सागर दहाल बताउँछन् । जसकालागि पनि कोरोना कहरलाई बिर्सिएर आज यहाँ सेवाग्राही एकैचोटी भिडभाडमा रहेको देखिन्छन् ।
कोरोना महामारीका कारण झापामा निषेधाज्ञा जारी रहेको वर्तमान अवस्थामा सामाजिक सुरक्षा भत्ताका नाममा बुढापाका जेष्ठ मातापिता, एकल महिला, शारीरीक रुपमा अशक्त, दलित लगायत विभिन्न विषयमा भत्ता प्राप्त गर्ने समाजका आदरणीय व्यक्तित्वहरुलाई यो भिडभाडबाट अलग राखेर भत्ता वितरणलाई सहजीकरण गर्ने कामको जिम्मेवारी कसको हो भन्ने विषयमा सर्वत्र चासोको विषय बनेको छ ।
