प्रेस विज्ञप्तीको भाषा शैलीका कारण पार्टीको चरित्र उदाङ्गो भएको ओझाको ठहर
कनकाई खबर / नेकपा माओवादी केन्द्र कनकाईले पार्टीको तत्कालिन नगर कमिटिका दुई जना नेतालाई साधारण सदस्य समेत नरहनेगरी निलम्बन गरेको छ ।
नेकपा एमाले र तत्कालिन माओवादी केन्द्र मिलेर बनेको नेकपामा माओवादी केन्द्रको भागमा परेको कनकाई ५ का पार्टी अध्यक्ष पुण्यप्रसाद ओझा र वडा नं. ७ का अध्यक्ष देवीप्रसाद भट्टराईलाई माओवादी केन्द्रको साधारण सदस्य समेत नरहने गरी पार्टीले निलम्बन गरेको नेकपा माओवादी केन्द्र कनकाई नगर कमिटिले साउन २१ गते विहिवार जारी गरेको प्रेस विज्ञप्तीमा जनाइएको छ ।
माओवादी केन्द्र कनकाई नगर संयोजक विष्णुप्रसाद बिमलीद्वारा हस्ताक्षर गरिएको विज्ञप्तीमा पार्टीको विस्तारीत वैठकबाट पार्टी अनुशासन उल्लङ्घन गरेको भन्दै पार्टीबाट निलम्बन गरेको जनाइएको छ । विज्ञप्तीमा ओझा र भट्टराईलाई प्रतिगमनकारी गुटको मतियार बनी देश र जनताप्रति गद्धार गरेको आरोप लगाइएको छ ।
उता माओवादी केन्द्रको भागबन्डामा दुईवटा वडाको जिम्मेवारी पाएका ओझा र भट्टराई तत्कालिन माओवादी केन्द्रको पछिल्लो राजनीतिक गतिविधिप्रति असन्तुष्टि बन्दै आएको बताउँछन् । पार्टी विभाजनपछि पनि समाज विकासका निम्ति सामाजिक एकता कायम राख्न सधैं स्थिर रहेकै कारण सोही जिम्मेवारीमा नेकपा एमालेको तर्फबाट हाल सम्म पनि निरन्तर जनताको सेवा गर्दै आएको ओझा र भट्टराईले कनकाई खबरको जिज्ञासामा प्रष्ट पारेका छन् ।
माओवादी केन्द्रबाट भएको कार्वाहीका बारेमा थप जिज्ञासा राख्दा ओझा र भट्टराईले ढिलै भएपनि विज्ञप्ती मार्फत आँफूहरुलाई सार्वजनिक गरिदिएकोमा माओवादी केन्द्र कनकाई नगर कमिटीलाई विशेष धन्यवाद प्रकट गरेका छन् । पार्टीको जिम्मेवारीमा रहँदा झुटको खेती नगरीकन ईमान्दारीता र निस्वार्थका साथ आँफुहरु सामाजिक क्षेत्रमा क्रियाशिल रहेकै कारण वडावासीको विश्वास जित्न सफल भएको भन्दै माओवादी केन्द्रबाट निलम्बनमा परेका ओझाले पार्टीले सार्वजनिक गरेको प्रेस विज्ञप्तीमा प्रयोग भएको भाषा शैलीले पनि पार्टीको चरित्र उदाङ्गो भएको प्रतिक्रिया दिएका छन् ।
