कनकाई खबर / कारितास नेपालले कोरोना संक्रमण भई होम आइसोलेशनमा रहेका कनकाई नगरबासीका लागि अतिआवश्यकीय स्वास्थ्य सामाग्री सेट हस्तान्तरण गरेको छ ।
“कोभिडमा राहत, सामाजिक क्षेत्रमा साथ, परोपकारी मनले बढाउँ सहयोगी हात” भन्ने मूल मन्त्रका साथ मानवीय सेवामा अघि बढेको कारितास नेपालले झापा र मोरङ् जिल्लामा ९०० सेट किट बक्स हस्तान्तरण गरेको संस्थाको दमक कार्यालयका प्रमुख देवेन्द्र पोखरेलले बताएका छन् । कोरोना महामारीको वर्तमान अवस्थामा थोरै भएपनि सरकारलाई सहयोग गर्ने उद्येश्यले कारितास नेपालले यस अघि मेची प्रादेशिक अस्पताललाई २६ लाख बराबरको स्वास्थ्य सामाग्री, विराटनगर कोभिड अस्पताललाई १६ लाख बराबरको साथै दमक अस्पताललाई समेत आवश्यक सहयोग गरेको कारितास नेपाल दमक शाखाका प्रमुख पोखरेलले जानकारी दिएका छन् ।
कारितास ईन्टरनेशनलको आर्थिक सहयोगमा कारितास नेपालद्धारा संचालित ‘कोभिड १९ प्रतिकार्य परियोजना २०२१’ अन्तर्गत रहेर स्वास्थ्य सामाग्री हस्तान्तरण गर्दै आएको दमक कार्यालय प्रमुख पोखरेलले बताए । कनकाई नगरपालिका क्षेत्रका कोरोना संक्रमित १५० परिवारकालागि संस्थाका तर्फबाट कनकाई नगरपालिकाका प्रमुख राजेन्द्रकुमार पोखरेललाई किट बक्स सेट हस्तान्तरण गरिएको हो । नगरपालिका परिसरमा कारितासका तर्फबाट दमक कार्यालय प्रमुख पोखरेलसहित सामाजिक परिचालक गोविन्दराज कट्टेल र सीता भट्टराई काफ्ले, कनकाई प्रमुख विवेक शिवाकोटीसहितको उपस्थितीमा नगरप्रमुख पोखरेललाई स्वास्थ्य सामाग्रीसहितको किट बक्स हस्तान्तरण गरिएको हो । नगरपालिकामा औपचारिक रुपमा भएको स्वास्थ्य सामाग्री हस्तान्तरणपछि कारितास नेपालका पदाधिकारीहरुबाट जनप्रतिनिधिहरुसहित नगरभित्र रहेका कोरोना संक्रमितहरुसँग प्रत्यक्ष भेटघाटमा गएर स्वास्थ्य सामाग्री हस्तान्तरण गर्ने योजना रहेको बताइएको छ ।
कारितास नेपालले कनकाई नगरमा सुरक्षित वैदेशिक रोजगारीको कार्यक्रम समेत संचालन गर्दै आएको बताइएको छ । नगर क्षेत्रमा विभिन्न सिपमूलक तालिम समेत संचालन गर्दै आएको कारितासले वेरोजगार युवाहरुलाई स्वदेशमै आत्मनिर्भर बनाउँने गरीको कार्यक्रम समेत अघि बढाएको छ ।
कनकाईमा हस्तान्तरण गरिएको स्वास्थ्य सामाग्रीसहितको किट बक्स सेटमा सर्जिकल मास्क दुई पाकेट, ग्लोब्स एक बट्टा, थर्ममिटर,अक्सिमिटर र ह्याण्ड वास एक—एक वटा, सेनीटाइजर २०० एमएलको दुईवटा, पारासिटामोल ३० वटा गरी एक सेट किट बक्स एक परिवारकालागि व्यवस्थापन गरिएको कारिता नेपाल कनकाईका प्रमुख विवेक शिवाकोटीले जानकारी दिएका छन् ।
कनकाई नगरपालिकाका प्रमुख राजेन्द्रकुमार पोखरेलले कोरोना संक्रमितकालागि अतिआवश्यक पर्ने स्वास्थ्य सामाग्रीसहितको किट बक्स रामवाणका रुपमा रहेको भन्दै कारितास नेपालले संकटका बेला गरेको यो सहयोग महत्वपूर्ण भएको टिप्पणी गरेका छन् । मानवीय सेवामा समर्पित कारितास नेपालसँग आगामी दिनमा समेत सहकार्य गरेर अघि बढ्ने कार्यमा कनकाई नगरपालिका सधैं सकारात्मक रहेको नगर प्रमुख पोखरेलले बताएका छन् ।
