कनकाई खबर \ कनकाई नगरपालिकाले संचालन गरेको कोरोना विरुद्धको खोप अभियानमा कुनै अनियमितता नभएको कनकाई नगरपालिकाका प्रमुख राजेन्द्रकुमार पोखरेलले बताएका छन् ।
प्राथमिक स्वास्थ्य केन्द्रको खोप केन्द्रमा बेपत्ता भएको भनिएका खोपका विषयमा सम्बन्धित केन्द्रका स्वास्थ्यकर्मी र कर्मचारीसँग स्पष्टीकरण माग गर्दै सुरक्षाकर्मी साथै संचारकर्मीसहितको उपस्थितीमा नगर प्रमुख पोखरेलले खोपका विषयमा कनकाई नगरपालिकाको तर्फबाट कुनै किसिमको अनियमितता नभएको प्रष्ट पारेका छन् ।
खोपलाई चुस्तदुरुस्त बनाउँने कार्यमा नगरपालिकाको सिङ्गो टिम सचेत रहेको भन्दै नगर प्रमुख पोखरेलले कनकाईमा एउटै मात्र पनि खोपको दुरुपयोग भएको प्रमाणित भएमा त्यस्तो गतिविधिमा सम्लग्न जोकोहीलाई पनि नियमअनुसार तुरुन्त सजाय हुने कुरामा आँफू प्रतिवद्ध रहेको बताएका छन् । केन्द्रबाट आएको सिमित खोपलाई अत्यन्तै संवेदनशिलताका साथ कार्यपालिकाको बैठकमा व्यापक छलफल गरी आवश्यक्ता अनुसार खोप केन्द्रमा जिम्मेवारी समेत तोकेर खोपलाई व्यवस्थित बनाइएको नगर प्रमुख पोखरेलले प्रष्ट पारेका छन् ।
नगरवासीलाई बढी भन्दा बढी खोप लगाउँने कार्यमा नगरपालिका गम्भिर भएको प्रष्ट पार्दै नगर प्रमुख पोखरेलले सकारात्मक साथै रचनात्मक सहयोगकालागि क्रियाशिल राजनीतिक दल, सामाजिक संघसंस्था, उद्योगीव्यवसायी, वौद्धिक समाज लगायत सरोकारवाला सबैसँग अपिल गरेका छन् ।
कनकाई नगरपालिकाको स्वास्थ्य शाखाका प्रमुख खगेन्द्र दंगालले प्राथमिक स्वास्थ्य केन्द्र सुरुङ्गाको खोप केन्द्रमा यहि साउन १७ गतेका दिन खटिएका कर्मचारीको प्राविधिक त्रुटीका कारण खोपका विषयमा स्वास्थ्यकर्मी समेत अन्यौलमा परेको बताएका छन् । भेरोसिल खोपको पहिलो मात्रा अन्तर्गत आइतवार र सोमबार लक्षित वर्ग ५५ वर्ष र सो भन्दा माथिको उमेर समूहका ३ हजार बढी नगरवासीले खोप सेवा लिएका छन् ।
आइतवार सम्पन्न भएको खोप कार्यक्रममा प्राथमिक स्वास्थ्य केन्द्रको खोप केन्द्रमा ६५ र नगरपालिकाको खोप केन्द्रमा ८ डोज खोपको मात्रा बेपत्ता भएको समाचार कनकाई खबरको अनलाइन संस्करणले महत्वका साथ सार्वजनिक गरेसँगै सर्वत्र चासोको विषय बनेको थियो । सर्वत्र चासोको विषय बनेको खोपका विषयमा नगरको स्वास्थ्य शाखाले प्राथमिक स्वास्थ्य केन्द्रमा थप ३३ डोज खोपको रजिष्टरमा रेकर्ड राख्न छुटेको र ८ डोज खोपको मात्रा खेर गएको जानकारी दिँदै जम्मा ६७६ खोपको हिसाब देखाएको छ । त्यस्तै नगरपालिकाको खोप केन्द्रमा ८ डोज खोप खेर गएको जनाइएको छ ।
यसरी नगरपालिकाको स्वास्थ्य शाखाले दिएको जानकारी अनुसार साउन १७ र १८ गते दुई दिनमा क्रमशः १८४० र ११९४ गरी ३ हजार ३४ डोज कोरोना विरुद्धको भेरोसिल खोप ५५ वर्ष माथिका नगरवासीका निम्ति खपत भएको बताइएको छ ।
उता स्वास्थ्य कार्यालय झापाका खोप अधिकृत ईश्वरी पौडेलका अनुसार कनकाई नगरमा यस पटक भेरोसिलको पहिलो खोपको मात्रा ३ हजार ९६ डोज खोप आएको हो ।
