कनकाई खबर \ कोरोना भाइरसको दोस्रो लहरसँगै संक्रमण अनियन्त्रित भएपछि झापामा एकपछि अर्को हुँदै स्थानीय तहले आफ्नो पालिका क्षेत्र सिल गर्दै गएका छन् ।
जिल्लाका १५ स्थानीय तह मध्ये बुद्धशान्ति गाउँपालिका, अर्जुनधारा नगरपालिका अन्तर्गतको शनिश्चरे बजार, कनकाई नगरपालिका यसअघिनै सिल गरिएका छन् । आइतबार झापामा थप दुई पालिकाहरु दमक र शिवसताक्षीसमेत सिल गर्ने निर्णय भएको बताइएको छ ।
त्यस्तै संक्रमण नियन्त्रणका लागि भन्दै बिर्तामोड नगरपालिकाले समेत साउन १३ गते राति १२ बजेबाट नगरपालिका क्षेत्र सिल गर्ने निर्णय गरेको बताइएको छ । शिवसताक्षी र दमक नगरपालिका भने सोमबार राति १२ बजेबाट सिल गरिने सबन्धित पालिका स्रोतले जनाएको छ ।
योसँगै झापाका १५ पालिका मध्ये ६ वटा पालिकाहरुले आफ्नो क्षेत्र सिल गर्ने निर्णय गरेका हुन् । अन्य पालिका क्षेत्रमा संक्रमणको अवस्थालाई हेरेर निर्णय गर्ने सम्बन्धित पालिका स्रोतले जानकारी दिएको छ ।
