कनकाई खबर / कोरोना भाइरसको संक्रमण तिव्र गतिमा फैलिएको भन्दै कनकाई नगरपालिकाको कार्यालयले अत्यावश्यक सेवा बाहेक नगर क्षेत्रलाई एक हप्ताकालागि शिल गरेको छ ।
कनकाई नगरपालिकाको कोरोना रोकथाम तथा नियन्त्रण समितिको आज शुक्रवार बसेको बैठकको निर्णयानुसार भोली साउन ९ गते शनिवार राती १० बजेदेखि साउन १६ गते शनिवार राती १० बजे सम्मकालागि सम्पूर्ण वडाहरु पूर्ण रुपमा बन्दाबन्दी(शिल) गरिएको कनकाई नगरपालिकाका निमित्त प्रमुख प्रशासकीय अधिकृत हरिप्रसाद मिश्रद्वारा हस्ताक्षर गरिएको नगरपालिकाबाट जारी सुचनामा जनाइएको छ ।
बन्दाबन्दीको समयमा नगरभित्रका अत्यावश्यक सेवा बाहेक सबै किसिमका पसल तथा व्यवसायहरु, बैंक तथा वित्तिय संस्थाबाट दिइँदै आएको सम्पूर्ण सेवाहरु बन्द गरिएको बताइएको छ । बन्दाबन्दीको समयमा जारी सुचनालाई उल्लंघन गरेको पाइएमा संक्रामक रोग ऐन २०२० बमोजीम कार्वाही हुने जनाइएको छ । बन्दाबन्दीको समयमा स्वास्थ्य सुरक्षाको मापदण्डलाई पूर्ण रुपमा पालना गर्न गराउँन मातहतका सम्पूर्ण निकायलाई समेत अनुरोध गरिएको बताइएको छ ।
कनकाई नगर क्षेत्रमा कोरोना संक्रमणका कारण पहिलो लहरमा २ सय ५४ जना संक्रमित भएका थिए भने दोस्रो लहरमा हालसम्ममा ८ सय २६ जना गरी जम्मा १ हजार ८० जना नगरबासी संक्रमित भइसकेको कनकाई नगरका कोरोना फोकल पर्सन नारायण अधिकारीले जानकारी दिए । उनका अनुसार हलसम्ममा डिस्चार्ज हुनेको संख्या ८ सय ४३ जना र होमआइसोलेशनमा २ सय ६ जना रहेका छन् । नगरपालिकाको स्वास्थ्य शाखालाई जानकारी भएसम्म हाल विभिन्न अस्पतालमा तीनजनाको उपचार भइरहेको फोकल पर्सन अधिकारीले कनकाई खबरलाई जानकारी दिए ।
पहिलो लहरमा ४ पुरुष र २ महिला सहित ६ जनाको कोरोना संक्रमणका कारण निधन भएको बताइएको छ । त्यस्तै दोस्रो लहरको हालसम्म ५ महिलासहित १७ पुरुष गरी २२ जनाको निधन भएसँगै कोरोना भाइरसका कारण हालसम्ममा जम्मा २८ जना नगरवासीको निधन भइसकेको बताइएको छ ।
Advertisement :
