कनकाई खबर \ कनकाई नगरपालिकाले स्थापना गर्न लागेको अक्सिजन प्लान्टकालागि रोटरी क्लव अफ सुरुङ्गाले २ लाख ३५ हजार ९९ रुपैंयाँसहित एक थान कन्सेनट्रेटर सहयोग गरेको छ ।
कोरोना महामारीको यो समयमा कनकाई नगरपालिकाले प्रस्तावित नगर अस्पतालमा स्थापना गर्न लागेको अक्सिजन प्लान्टकालागि थोरै भएपनि राहत मिलोस् भन्ने उद्येश्यले क्लवको संयोजनमा सहयोग रकम संकलन भएको क्लवका वर्ष २०२०÷२१ का अध्यक्ष टिकाप्रसाद जमरकट्टेलले बताएका छन् ।
स्थानीय सरकारले चालेको अभियानमा आफूहरुको समेत दायित्व सम्झेर क्लवको कार्यसमितिका पदाधिकारी तथा सदस्यहरु साथै केही सहयोगी शुभचिन्तकहरुबाट संकलन भएको सहयोग रकम हस्तान्तरण गरिएको अध्यक्ष कट्टेलले जानकारी दिए । क्लवका संस्थापक अध्यक्ष एलपी उप्रेती, निवर्तमान अध्यक्ष कुमारमणि पोखरेल, वर्ष २०२०÷२१ का अध्यक्ष टिकाप्रसाद जमरकट्टेल, वर्ष २०२१ ÷२२ का अध्यक्ष सुशिल श्रेष्ठसहित कार्यसमितिका अन्य पदाधिकारीहरुको उपस्थितीमा कनकाई नगरपालिकाको कार्यालयमा नै गएर सहयोग रकम साथै अक्सिजन कन्सेनट्रेटर हस्तान्तरण गरिएको क्लवका प्रथम उपाध्यक्ष शिव कडेलले जानकारी दिए ।
मानवीय सेवामा समर्पित अन्तर्राष्ट्रिय रुपमा मान्यता प्राप्त सामाजिक संस्था रोटरी क्लव अफ सुरुङ्गाबाट यो महामारीको समयमा भएको सहयोग महत्वपूर्ण भएको कनकाई नगरपालिकाका प्रमुख राजेन्द्र पोखरेलले बताएका छन् । अक्सिजन प्लान्ट सहयोग तथा व्यवस्थापन समितिका संयोजक समेत रहेका नगरपालिकाका प्रमुख पोखरेलले यस महान मानवीय कार्यमा जोडिनुभएकोमा सहयोगी मनहरुप्रति हार्दिक आभार प्रकट गर्दै सुस्वास्थ्य एवम् दिर्घायुको कामना गरेका छन् ।
यस क्षेत्रमा क्रियाशिल सामाजिक अभियन्ताहरुले नेतृत्व गरेको सामाजिक संस्था रोटरी क्लव अफ सुरुङ्गाले संस्थाको स्थापनादेखि नै शिक्षा, स्वास्थ्य, शुद्ध पिउने पानी लगायतका क्षेत्रमा महत्वपूर्ण सहयोग गर्दै आएको बताइएको छ ।
