कनकाई खबर \ कोरोना संक्रमणका कारण झापाको कनकाईमा ६० वर्षिय एक पुरुषको निधन भएको छ । दोस्रो लहरमा ११ जना सहित कनकाईमा कोरोनाका कारण ज्यान गुमाउँनेको संख्या १७ पुगेको छ ।
कनकाई १ निवासी तिम्सिना थरका पुरुषको मेची प्रादेशिक अस्पताल भद्रपुरमा हिजो विहिबार राती ११ बजे निधन भएको कनकाई नगरपालिकाका कोरोना फोकल पर्सन नारायण अधिकारीले जानकारी दिएका छन् । फोकल पर्सन अधिकारीका अनुसार स्वास्थ्यमा समस्या देखिएपछि कोटीहोमस्थित प्रयोगशालामा भएको परिक्षणबाट जेठ २२ गते तिम्सिनाका बाबुछोराको नै पिसिआर रिपोर्ट पोजेटिभ आएको थियो ।
सुगरको मात्रा अत्यधिक बढेर स्वास्थ्यमा थप समस्या आएपछि कनकाई नगर अस्पतालको आइसोलेशनमा राखिएको भएपनि तिम्सिनालाई सोही दिन बेलुकै मेची प्रादेशिक अस्पताल भद्रपुरमा रेफर गरिएको थियो । तिम्सिनाका छोराको यस अघि नै नेगेटिभ आएपछि हाल सामान्य अवस्थामा आइसकेको कनकाई १ का वडाअध्यक्ष रोशन पोखरेलले जानकारी दिएका छन् । तिम्सिनाको शब व्यवस्थानकालागि वडाअध्यक्ष पोखरेल परिवारका सदस्यसहित अहिले विहानै भद्रपुर अस्पताल पुगीसकेको बताइएको छ । उनको आजै कनकाई घाटमा अन्त्यष्टी हुने वडाअध्यक्ष पोखरेलले जानकारी दिए ।
स्थानीयस्तरका विभिन्न सामाजिक संघसंस्थामा क्रियाशिल तिम्सिना समाजका अत्यन्तै सहयोगी अभियन्ता भएको उनका छिमेकी कनकाई नगरपालिकाका कर्मचारी लक्ष्मीप्रसाद अधिकारीले कनकाई खबरलाई जानकारी दिएका छन् । तिम्सिनाका श्रीमति, तीन छोरा र तीन छोरी रहेको बताइएको छ ।
