कनकाई खबर \ कनकाई नगरपालिकाले स्थापना गर्न लागेको अक्सिजन प्लान्टकालागि कनकाई—४ निवासी रामप्रसाद र जसोदा घिमिरेले परिवारका तर्फबाट २५ हजार ५ सय ५५ सहयोग रकम हस्तान्तरण गरेका छन् ।
दाता घिमिरे परिवारबाट कनकाई नगरपालिकाले स्थापना गर्न लागेको प्राण वायुका रुपमा रहेको अक्सिजन प्लान्टकालागि थोरै भएपनि आर्थिक सहयोग गरेको बताएका छन् । दाता परिवारका तर्फबाट कनकाई नगरपालिकाका प्रमुख राजेन्द्रकुमार पोखरेललाई निजी निवासमै निमन्त्रणा गरी सहयोग रकम हस्तान्तरण गरिएको हो ।
कोरोना महामारीको यो समयमा कोरोना भाइरसका कारण संक्रमित भएका विरामीहरुले सहज रुपमा अक्सिजन नपाएर ज्यान गुमाइरहेको वर्तमान अवस्थामा कनकाई नगरपालिकाले चालेको अभियानका बारेमा झापाको कनकाई नगरबाट प्रकाशन हुँदै आएको यहाँको लोकप्रिय संचार माध्यम कनकाई खबर डटकम अनलाइन मार्फत जानकारी प्राप्त भएपछि आँफूहरुलाई समेत सहयोगको भावना जागेको दाता घिमिरेले बताए ।
समाजसेवी सहयोगी भावनाका घिमिरे परिवारबाट यो महामारीको समयमा प्राप्त भएको आशिर्वादले कनकाई नगरपालिकाले चालेको अभियानमा थप हौसला प्राप्त भएको कनकाई नगरपालिकाका प्रमख राजेन्द्र पोखरेलले बताएका छन् । अक्सिजन प्लान्ट सहयोग तथा व्यवस्थापन समितिका संयोजक समेत रहेका नगरपालिकाका प्रमुख पोखरेलले यस महान मानवीय कार्यमा जोडिनुभएकोमा दाता परिवारप्रति हार्दिक आभार प्रकट गर्दै सुस्वास्थ्य एवम् दिर्घायुको कामना गरेका छन् ।
साथै स्वदेश तथा विदेशमा रहनुभएका सम्पूर्ण सहयोगी मनहरुलाई नेपाल बैंक सुरुङ्गा शाखाको खातामा रकम जम्मा गरेर पनि सहयोग गर्न सकिने नगर प्रमुख पोखरेलले जानकारी गराएका छन् ।
नेपाल बैंक सुरुङ्गा शाखा, कनकाई नगरपालिका प्रकोप व्यवस्थापन कोष खाता, खाता नम्बर—१४७०३०००००७००२०००००१
