कनकाई खबर / कनकाई नगरपालिकाले स्थापना गर्न लागेको अक्सिजन प्लान्टकालागि स्वदेश तथा विदेशमा समेत रहेका नगरवासीहरुबाट सहयोग रकम आउँने क्रम तिब्र रुपमा अघि बढेको छ ।
यसै क्रममा हाल अमेरिकाको भर्जिनियामा बस्दै आएका कनकाई ३ सुरुङ्गाका गोपीचन्द्र कट्टेल र पुण्यप्रभा पोखरेल (कट्टेल) सहित परिवारका तर्फबाट ५१ हजार नगद सहयोग प्राप्त भएको छ । आँफूहरु अमेरिकामै रहेपनि कनकाई नगर क्षेत्रका हरेक गतिविधिहरुका बारेमा विभिन्न माध्यमबाट जानकारी प्राप्त भइरहेको भन्दै गोपीचन्द्रले हाल कोरोना कहरका विच कनकाई नगरपालिकाले चालेको अभियानप्रति खुशी व्यक्त गर्दै थोरै भएपनि आर्थिक सहयोग गरेको बताए ।
दाता कट्टेल परिवारबाट प्राप्त सहयोग रकम सुरुङ्गा निवासी पुण्यप्रभा पोखरेल कट्टेलका बुबा एवम् गोपीचन्द्र कट्टेलका ससुराबुबा कोमलप्रसाद पोखरेलबाट कनकाई नगरपालिकाका प्रमुख राजेन्द्रकुमार पोखरेललाई शनिवार निजी निवासमै निमन्त्रणा गरी हस्तान्तरण गरिएको हो ।
कोरोना महामारीको यो समयमा कोरोना भाइरसका कारण संक्रमित भएका विरामीहरुले सहज रुपमा अक्सिजन नपाएर ज्यान गुमाइरहेको वर्तमान अवस्थामा कनकाई नगरपालिकाले चालेको अभियानका बारेमा झापाको कनकाई नगरबाट प्रकाशन हुँदै आएको यहाँको लोकप्रिय संचार माध्यम कनकाई खबर डटकम अनलाइन मार्फत जानकारी प्राप्त भएपछि आँफूलाई समेत सहयोगको भावना जागेको दाताले बताएका छन् ।
विदेशमा रहेर पनि यो महामारीको समयमा कट्टेल परिवारबाट भएको सहयोगले कनकाई नगरपालिकाले चालेको अभियानमा थप हौसला प्राप्त भएको कनकाई नगरपालिकाका प्रमख राजेन्द्र पोखरेलले बताएका छन् । अक्सिजन प्लान्ट सहयोग तथा व्यवस्थापन समितिका संयोजक समेत रहेका नगरपालिकाका प्रमुख पोखरेलले यस महान मानवीय कार्यमा जोडिनुभएकोमा दाता परिवारप्रति हार्दिक आभार प्रकट गर्दै सुस्वास्थ्य एवम् दिर्घायुको कामना गरेका छन् ।
साथै स्वदेश तथा विदेशमा रहनुभएका सम्पूर्ण सहयोगी मनहरुलाई तपशिलमा उल्लेखित विवरणको खातामा रकम जम्मा गरेर पनि सहयोग गर्न सकिने नगर प्रमुख पोखरेलले जानकारी गराएका छन् ।
नेपाल बैंक सुरुङ्गा शाखा, कनकाई नगरपालिका प्रकोप व्यवस्थापन कोष खाता, खाता नम्बर—१४७०३०००००७००२०००००१
