कनकाई खबर \ कनकाई नगरपालिकाले स्थापना गर्न लागेको अक्सिजन प्लान्टकालागि कनकाई ३ सुरुङ्गा निवासी समालोचक एवम् साहित्यकार कोमलप्रसाद पोखरेलबाट १५ हजार सहयोग रकम प्राप्त भएको छ ।
आफ्नो जन्म दिनको अवसर पारेर दाता पोखरेलले पाँच वर्ष अघि दिवंगत आफ्नी जीवनसंगिनी स्व.धर्मादेवी पोखरेलको समेत स्मृत्तिमा कनकाई नगरपालिकाले स्थापना गर्न लागेको प्राण वायुका रुपमा रहेको अक्सिजन प्लान्टकालागि थोरै भएपनि आर्थिक सहयोग गरेको बताएका छन् ।
दाता पोखरेलले कनकाई नगरपालिकाका प्रमुख राजेन्द्रकुमार पोखरेललाई आज शनिवार निजी निवासमै निमन्त्रणा गरी सहयोग रकम हस्तान्तरण गरेका हुन् । लामो समयसम्म प्राध्यापन क्षेत्रमा क्रियाशिल साहित्यका राष्ट्रिय प्रतिभाका रुपमा स्थापित शिक्षासेवी पोखरेल कनकाई मावि सुरुङ्गाबाट स्वेच्छिक अवकाश साथै कनकाई बहुमुखी क्याम्पस सुरुङ्गाका सेवानिवृत्त प्राध्यापक हुन् ।
कोरोना महामारीको यो समयमा कोरोना भाइरसका कारण संक्रमित भएका विरामीहरुले सहज रुपमा अक्सिजन नपाएर ज्यान गुमाइरहेको वर्तमान अवस्थामा कनकाई नगरपालिकाले चालेको अभियानका बारेमा झापाको कनकाई नगरबाट प्रकाशन हुँदै आएको यहाँको लोकप्रिय संचार माध्यम कनकाई खबर डटकम अनलाइन मार्फत जानकारी प्राप्त भएपछि आँफूलाई समेत सहयोगको भावना जागेको दाता पोखरेलले बताए ।
आजकै मितिबाट ८० वर्षमा प्रवेश हुनुभएका शिक्षासेवी पोखरेलबाट यो महामारीको समयमा प्राप्त भएको आशिर्वादले कनकाई नगरपालिकाले चालेको अभियानमा थप हौसला प्राप्त भएको कनकाई नगरपालिकाका प्रमख राजेन्द्र पोखरेलले बताएका छन् । अक्सिजन प्लान्ट सहयोग तथा व्यवस्थापन समितिका संयोजक समेत रहेका नगरपालिकाका प्रमुख पोखरेलले यस महान मानवीय कार्यमा जोडिनुभएकोमा आफ्ना गुरु समेत रहनुभएका दाता पोखरेलप्रति हार्दिक आभार प्रकट गर्दै सुस्वास्थ्य एवम् दिर्घायुको कामना गरेका छन् । साथै स्वदेश तथा विदेशमा रहनुभएका सम्पूर्ण सहयोगी मनहरुलाई तपशिलमा उल्लेखित विवरणको खातामा रकम जम्मा गरेर पनि सहयोग गर्न सकिने नगर प्रमुख पोखरेलले जानकारी गराएका छन् ।
नेपाल बैंक सुरुङ्गा शाखा, कनकाई नगरपालिका प्रकोप व्यवस्थापन कोष खाता, खाता नम्बर—१४७०३०००००७००२०००००१
