कनकाई खबर \ कोरोना कहरका विचमा पनि अग्र पंक्तिमा रहेर जनताको सेवा गर्दै आएका सुरक्षाकर्मीलाई राष्ट्रिय युवा संघ नेपाल कनकाई नगर कमिटीले अत्यावश्यक स्वास्थ्य सामाग्री हस्तान्तरण गरेको छ ।
कनकाई ३ सुरुङ्गास्थित पुजादेवी मेडिसिन सेन्टरका सन्चालक सिरश खरेल र पुजा खरेलको सौजन्यमा ईलाका प्रहरी कार्यालय सुरुङ्गा र ट्राफिक प्रहरी कार्यालय सुरुङ्गालाई स्वास्थ्य सामाग्री हस्तान्तरण गरेको हो । कनकाई नगर क्षेत्रका एक सफल क्रिकेटर समेत रहेका युवा व्यवसायी सिरश खरेल र अत्यन्तै सहयोगी भावना भएकी पुजा खरेलले संचालन गरेको मेडिसिन सेन्टरका तर्फबाट स्वास्थ्य सामाग्री हस्तान्तरण गरिएको हो ।
यसरी हस्तान्तरण गरिएका सामाग्रीहरुमा सेनिटाइजर १० लिटर, एन नाइन्टी फाइभ मास्क २० थान, सर्जिकल मास्क २० थान, सर्जीकल ग्लोव्स ६ थान, साधारण ग्लोव्स १ बट्टा, साबुन २० थान, हेन्डवास २ थान, भाइरस किलर स्प्रे १ थान, फेस सिल्ड २० थान लगायतका स्वास्थ्य सामाग्री एक मुष्ठ रुपमा युवा संघ मार्फत ईलाका प्रहरी र ट्राफिक प्रहरी कार्यालय सुरुङ्गालाई हस्तान्तरण गरिएको युवा संघ कनकाईका अध्यक्ष विश्व विजय खरेलले जानकारी दिएका छन् ।
अत्यावश्यक स्वास्थ्य सामाग्री ग्रहण गर्दै ईलाका प्रहरी कार्यालय सुरुङ्गाका प्रहरी प्रमुख उदयसमशेर जबराले सहयोगी सम्पूर्ण दाताहरुलाई बधाई तथा शुभकामना व्यक्त गर्दै आगामी दिनमा आर्थिक, सामाजिक तथा व्यक्तिगत जीवनको समेत उत्तरोत्तर प्रगतिको कामना सहित हार्दिक आभार प्रकट गरेका छन् ं।
युवा संघ कनकाईका पूर्व अध्यक्ष एवम् नेकपा एमाले कनकाई नगरका सचिव विनोद राना, संघका नगर सचिव केशव शिवाकोटी, सदस्य किशोर दहाल लगायतको उपस्थितीमा ईलाका प्रहरी प्रमुख जबरा र ट्राफिक प्रहरी सुरुङ्गाका प्रमुख चन्द्र बस्नेतलाई संयुक्त रुपमा स्वास्थ्य सामाग्री हस्तान्तरण गरिएको बताइएको छ ।
युवा संघ कनकाईले कोरोना महामारीका विचमा पनि स्थानीय सरकार कनकाई नगरपालिकाले निर्माण गर्न लागेको अक्सिजन प्लान्टकालागि नगरपालिकालाई सहयोग गर्ने उद्येश्यले अभियान संचालन गरेर आर्थिक संकलन गरिरहेको बताइएको छ । हाल सम्म करिब ५ लाख रकम संकलन गरिसकेको युवा संघले संकलन गरेको सहयोग रकम चाँडै एकमुष्ट रुपमा कनकाई नगरपालिकालाई हस्तान्तरण गर्ने योजना रहेको संघका नगर सचिव केशव शिवाकोटीले कनकाकई खबरलाई जानकारी दएका छन् ।
