कनकाई खबर \ कनकाई नगरपालिकाले स्थापना गर्न लागेको अक्सिजन प्लान्टकालागि जेष्ठ नागरिक संघ कनकाई नगर समितिका तर्फबाट ३० हजार सहयोग रकम प्राप्त भएको छ ।
जेष्ठ नागरिक संघ कनकाई नगर समितिबाट संकलन भएको रकम कनकाई नगरपालिकाका प्रमुख राजेन्द्र पोखरेलले संघको कार्यालयमै गएर ग्रहण गरेका थिए । स्थानीय सरकार कनकाई नगरपालिकाले स्थापना गर्न लागेको अक्सिजन प्लान्टकालागि थोरै भएपनि राहत मिलोस् भन्ने उद्येश्यले आर्थिक सहयोग गरेको संघका अध्यक्ष पुण्यप्रसाद बारकोटीले बताएका छन् ।
कोरोना महामारीको यो समयमा कोरोना भाइरसका कारण संक्रमित भएका विरामीहरुले सहज रुपमा अक्सिजन नपाएर ज्यान गुमाइरहेको वर्तमान अवस्थामा कनकाई नगरपालिकाले चालेको अभियानका बारेमा झापाको कनकाई नगरबाट प्रकाशन हुँदै आएको यहाँको लोकप्रिय संचार माध्यम कनकाई खबर डटकम अनलाइन मार्फत जानकारी प्राप्त भएपछि आँफूहरुलाई समेत सहयोगको भावना जागेको जेष्ठ नागरिक संघ कनकाईका अध्यक्ष बारकोटीले बताए । संघका अध्यक्ष बारकोटीको सभापतित्व एवम् नगर सचिव शम्भुप्रसाद पोखरेलले सहजीकरण गरेको संक्षिप्त कार्यक्रममा जेष्ठ नागरीक संघ नगर समितिका केही पदाधिकारीहरुको समेत उपस्थिती रहेको थियो ।
सहयोग रकम ग्रहण गर्दै कनकाई नगरपालिकाका प्रमुख राजेन्द्र पोखरेलले यो महामारीको समयमा समाजका जेष्ठ अभिभावकहरुबाट भएको सहयोग महत्वपूर्ण भएको बताएका छन् । अक्सिजन प्लान्ट सहयोग तथा व्यवस्थापन समितिका संयोजक समेत रहेका नगरपालिकाका प्रमुख पोखरेलले यस महान मानवीय कार्यमा जोडिनुभएकोमा सहयोगी मनप्रति हार्दिक आभार प्रकट गर्दै सुस्वास्थ्य एवम् दिर्घायुको कामना गरेका छन् ।
साथै स्वदेश तथा विदेशमा रहनुभएका सम्पूर्ण सहयोगी मनहरुलाई तपशिलमा उल्लेखित विवरणको खातामा रकम जम्मा गरेर पनि सहयोग गर्न सकिने नगर प्रमुख पोखरेलले जानकारी गराएका छन् ।
नेपाल बैंक सुरुङ्गा शाखा, कनकाई नगरपालिका प्रकोप व्यवस्थापन कोष खाता, खाता नम्बर—१४७०३०००००७००२०००००१
