कनकाई खबर \ कनकाई नगरपालिकाले स्थापना गर्न लागेको अक्सिजन प्लान्टकालागि सहयोग रकम जुट्ने क्रम जारी छ ।
यसै क्रममा कनकाई १ कालीमुडाका स्व.हिमबहादुर भुजेलको स्मृतिमा श्रीमति डम्बरकुमारी (शान्ता) भुजेल साथै बुबा बलबहादुर र आमा जगमाया भुजेलसहित परिवारले २५ हजार रुपैंयाँ सहयोग गरेको छ । वि.संं.२०६९ चैत ११ गतेका दिन ४३ वर्षको अल्पायुमै निधन भएका स्व.भुजेलको स्मृत्तिमा हाल इजरायलमा कार्यरत श्रीमति शान्ताबाट प्राप्त सहयोग रकम परिवारका तर्फबाट कनकाई नगरपालिकाको कार्यालयमै गएर स्व. भुजेलका बुबा बलबहादुर र भाइ गोकुल भुजेलले नगर प्रमुख राजेन्द्र पोखरेललाई हस्तान्तरण गरेका हुन् । स्व. भुजेलका बुबा, आमा, श्रीमति, दुईजना भाइ साथै एक छोरा उज्वल र एक छोरी निशा छन् ।
कोरोना महामारीको यो समयमा कोरोना भाइरसका कारण संक्रमित भएका विरामीहरुले सहज रुपमा अक्सिजन नपाएर ज्यान गुमाइरहेको वर्तमान अवस्थामा कनकाई नगरपालिकाले चालेको अभियानका बारेमा झापाको कनकाई नगरबाट प्रकाशन हुँदै आएको यहाँको लोकप्रिय संचार माध्यम कनकाई खबर डटकम अनलाइन मार्फत जानकारी प्राप्त भएपछि आँफूहरुलाई समेत सहयोगको भावना जागेको दाताले बताएका छन् । बुहारीको ईच्छाअनुसार परिवारको तर्फबाट कनकाई नगरपालिकाले स्थापना गर्न लागेको अक्सिजन प्लान्टकालागि थोरै भएपनि राहत मिलोस् भन्ने उद्येश्यले आर्थिक सहयोग गरेको दाता बलबहादुर भुजेलले बताए ।
सहयोग रकम ग्रहण गर्दै कनकाई नगरपालिकाका प्रमुख राजेन्द्र पोखरेलले यो महामारीको समयमा भुजेल परिवारबाट भएको सहयोग महत्वपूर्ण भएको बताएका छन् । सहयोग रकम जुटाउँनकालागि पत्रकार राम निरौलाबाट भएको भूमिका प्रति नगर प्रमुख पोखरेलले आभार प्रकट गरेका छन् । अक्सिजन प्लान्ट सहयोग तथा व्यवस्थापन समितिका संयोजक समेत रहेका नगरपालिकाका प्रमुख पोखरेलले यस महान मानवीय कार्यमा जोडिनुभएकोमा सहयोगी मनप्रति हार्दिक आभार प्रकट गर्दै सुस्वास्थ्य एवम् दिर्घायुको कामना गरेका छन् ।
साथै स्वदेश तथा विदेशमा रहनुभएका सम्पूर्ण सहयोगी मनहरुलाई तपशिलमा उल्लेखित विवरणको खातामा रकम जम्मा गरेर पनि सहयोग गर्न सकिने नगर प्रमुख पोखरेलले जानकारी गराएका छन् ।
नेपाल बैंक सुरुङ्गा शाखा, कनकाई नगरपालिका प्रकोप व्यवस्थापन कोष खाता, खाता नम्बर—१४७०३०००००७००२०००००१
