कनकाई खबर \ कनकाई नगरपालिकाले स्थापना गर्न लागेको अक्सिजन प्लान्टकालागि पशुपति अंग्रेजी माविका पूर्व विद्यार्थी एकता दहाल र दिपेश उप्रेतीले २० हजार ७ सय ४६ रुपैंयाँ सहयोग गरेका छन् ।
सम्बन्धले दिदीभाइ पर्ने यी दहाल र उप्रेती हाल अष्ट्रेलियामा रहेका छन् । दहाल कनकाई ३ सुरुङ्गा निवासी भुपेन्द्र एवम् लीला दाहालकी छोरी हुन् भने दिपेश कनकाई ३ सुरुङ्गा निवासी दयाराम र देवी उप्रेतीका छोरा हुन् । स्वदेश तथा विदेशमा समेत रहेका पशुपति माविका पूर्व विद्यार्थीहरु सामाजिक संजाल मार्फत जोडिएर केही दिन अघिदेखि नै रकम संकलन गर्दै आएको भएपनि यो महामारीको समयमा संकलन भएको एकमुष्ट सहयोग रकम पशुपति माविको भूतपूर्व विद्यार्थी समाजका प्रतिनिधिहरुबाट चाँडै कनकाई नगरपालिकालाई हस्तान्तरण हुने विद्यालयका पूर्व विद्यार्थी दुर्गाप्रसाद उप्रेतीले जानकारी दिएका छन् ।
कोरोना महामारीको यो समयमा कोरोना भाइरसका कारण संक्रमित भएका विरामीहरुले सहज रुपमा अक्सिजन नपाएर ज्यान गुमाइरहेको वर्तमान अवस्थामा कनकाई नगरपालिकाले चालेको अभियानका बारेमा झापाको कनकाई नगरबाट प्रकाशन हुँदै आएको यहाँको लोकप्रिय संचार माध्यम कनकाई खबर डटकम अनलाइन मार्फत जानकारी प्राप्त भएपछि आँफूहरुलाई समेत सहयोगको भावना जागेको दाताले बताएका छन् । विदेशमै रहे पनि दहाल र उप्रेतीले यो महामारीका समयमा आफ्नो गाउँ ठाउँको धेरै सम्झना आउँने गरेको भन्दै कनकाई नगरपालिकाले प्रस्तावित नगर अस्पतालमा स्थापना गर्न लागेको अक्सिजन प्लान्टकालागि थोरै भएपनि राहत मिलोस् भन्ने उद्येश्यले आर्थिक सहयोग गरेको बताएका छन् ।
सुनौलो भविष्य निर्माणकालागि विदेशिएका कनकाई नगरवासी युवाहरुबाट समेत यो महामारीको समयमा भएको सहयोग महत्वपूर्ण भएको कनकाई नगरपालिकाका प्रमुख राजेन्द्र पोखरेलले बताएका छन् । अक्सिजन प्लान्ट सहयोग तथा व्यवस्थापन समितिका संयोजक समेत रहेका नगरपालिकाका प्रमुख पोखरेलले यस महान मानवीय कार्यमा जोडिनुभएकोमा सहयोगी मनप्रति हार्दिक आभार प्रकट गर्दै सुस्वास्थ्य एवम् दिर्घायुको कामना गरेका छन् ।
साथै स्वदेश तथा विदेशमा रहनुभएका सम्पूर्ण सहयोगी मनहरुलाई तपशिलमा उल्लेखित विवरणको कनकाई नगरपालिकाको खातामा रकम जम्मा गरेर पनि सहयोग गर्न सकिने नगर प्रमुख पोखरेलले जानकारी गराएका छन् ।
नेपाल बैंक सुरुङ्गा शाखा, कनकाई नगरपालिका प्रकोप व्यवस्थापन कोष खाता, खाता नम्बर—१४७०३०००००७००२०००००१
