कनकाई खबर \ कनकाई नगरपालिकाले स्थापना गर्न लागेको अक्सिजन प्लान्टकालागि कनकाई ७ मा स्थायी घर भई हाल काठमाण्डौमा वसोवास गर्दै आएका गोपाल शिवाकोटी, श्रीमति प्रभा पाठक शिवाकोटी र छोरी प्रेरणा शिवाकोटीसहितको परिवारवाट २० हजार सहयोग रकम उपलव्ध भएको छ ।
काठमाण्डौस्थित अन्तर्राष्ट्रिय विमानस्थलमा कार्यरत शिवाकोटी कनकाई ७ कालिमुडा निवासी समाजसेवी महेश्वर र गीता शिवाकोटीका छोरा हुन् । कोरोना भाइरसका कारण संक्रमित भएका विरामीहरुले सहज रुपमा अक्सिजन नपाएर ज्यान गुमाइरहेको समाचार झापाको कनकाई नगरबाट प्रकाशन हुँदै आएको यहाँको लोकप्रिय संचार माध्यम कनकाई खबर डटकम अनलाइन सहित विभिन्न सामाजिक संजालहरुबाट समेत जानकारी प्राप्त भएसँगै कनकाई नगरपालिकाले स्थापना गर्न लागेको अक्सिजन प्लान्टकालागि थोरै भएपनि राहत मिलोस् भन्ने उद्येश्यले शिवाकोटीले आर्थिक सहयोग गरेको बताएका छन् ।
लामो समयदेखि काठमाण्डौस्थित विमानस्थलमा सेवा गर्दै आएका सकारात्मक साथै रचनात्मक सोच भएका जुझारु युवाका रुपमा स्थापित शिवाकोटीबाट यो महामारीको समयमा भएको सहयोग महत्वपूर्ण भएको कनकाई नगरपालिकाका प्रमुख राजेन्द्र पोखरेलले बताएका छन् । अक्सिजन प्लान्ट सहयोग तथा व्यवस्थापन समितिका संयोजक समेत रहेका नगर प्रमुख पोखरेलले यस महान मानवीय कार्यमा जोडिनुभएकोमा सहयोगी मनप्रति हार्दिक आभार प्रकट गर्दै सुस्वास्थ्य एवम् दिर्घायुको कामना गरेका छन् । साथै स्वदेश तथा विदेशमा रहनुभएका सम्पूर्ण सहयोगी मनहरुलाई तपशिलमा उल्लेखित विवरणको खातामा रकम जम्मा गरेर पनि सहयोग गर्न सकिने नगर प्रमुख पोखरेलले जानकारी गराएका छन् ।
नेपाल बैंक सुरुङ्गा शाखा, कनकाई नगरपालिका प्रकोप व्यवस्थापन कोष खाता, खाता नम्बर—१४७०३०००००७००२०००००१
