कनकाई खबर / झापाको कनकाई नगरपालिकाले स्थापना गर्न लागेको अक्सिजन प्लान्टकालागि कनकाई ३ स्थित पशुपति अंग्रेजी माविका पूर्व विद्यार्थी आशिष संग्रौला र दिपा ओली संग्रौलाले २५ हजार सहयोग गरेका छन् ।
कनकाई ३ को सुरुङ्गा बजार स्थायी घर भएपनि हाल अमेरिकामा बस्दै आएका संग्रौला पशुपति अंग्रेजी माविको एसएलसी वर्ष २०६३ को व्याचका विद्यार्थी हुन् ।
कोरोना भाइरसका कारण संक्रमित भएका विरामीहरुले सहज रुपमा अक्सिजन नपाएर ज्यान गुमाइरहेको समाचार झापाको कनकाई नगरबाट प्रकाशन हुँदै आएको कनकाई खबर डटकम अनलाइन सहित विभिन्न सामाजिक संजालहरुबाट समेत जानकारी प्राप्त भएसँगै कनकाई नगरपालिकाले स्थापना गर्न लागेको अक्सिजन प्लान्टकालागि थोरै भएपनि राहत मिलोस् भन्ने उद्येश्यले संग्रौलाले आर्थिक सहयोग गरेको बताएका छन् । सहयोग रकम पशुपति माविको भूतपूर्व विद्यार्थी समाजका प्रतिनिधिहरुबाट चाँडै कनकाई नगरपालिकालाई हस्तान्तरण हुने संग्रौलाले बताए ।
अक्सिजन प्लान्ट सहयोग तथा व्यवस्थापन समितिका संयोजक समेत रहेका कनकाई नगरपालिकाका प्रमुख राजेन्द्र पोखरेलले यस महान मानवीय कार्यमा जोडिनुभएकोमा सहयोगी मनप्रति हार्दिक आभार प्रकट गर्दै सुस्वास्थ्य एवम् दिर्घायुको कामना गरेका छन् । साथै स्वदेश तथा विदेशमा रहनुभएका सम्पूर्ण सहयोगी मनहरुलाई तपशिलमा उल्लेखित विवरणको खातामा रकम जम्मा गरेर पनि सहयोग गर्न सकिने नगर प्रमुख पोखरेलले जानकारी गराएका छन् ।
नेपाल बैंक सुरुङ्गा शाखा, कनकाई नगरपालिका प्रकोप व्यवस्थापन कोष खाता, खाता नम्बर—१४७०३०००००७००२०००००१
लामो समयदेखि अमेरिकामा बस्दै आएका सकारात्मक साथै रचनात्मक सोच भएका जुझारु युवाका रुपमा स्थापित संग्रौला हालै सम्पन्न नेपालीहरुको गयर आवासीय संस्था एनआरएनएको निर्वाचनमा बोर्ड अफ डाइरेक्टरमा निर्वाचित भएको बताइएको छ । बोर्ड अफ डाइरेक्टरमा निर्वाचित भएसँगै संग्रौलालाई नगर प्रमुख पोखरेलले कार्यकाल सफलताकालागि बधाई शुभकामना व्यक्त गरेका छन् । पशुपति माविका पूर्व विद्यार्थी समाजबाट समेत शुभकामना व्यक्त गर्दै कार्यकाल सफलताको कामना गरिएको विद्यालयका पूर्व विद्यार्थी दुर्गाप्रसाद उप्रेती (हाल अष्ट्रेलिया) ले बताए । त्यसैगरी पशुपति अंग्रेजी माध्यमिक विद्यालय व्यवस्थापन समितिका अध्यक्ष पुण्यप्रसाद उप्रेती साथै प्रधानाध्यापक एलपी उप्रेतीले विद्यालय परिवारको तर्फबाट पूर्व विद्यार्थी संग्रौलाको प्रगतिको कामना गर्दै कार्यकाल सफलताकालागि बधाई शुभकामना व्यक्त गरेका छन् ।
एनआरएनएको निर्वाचनमा बोर्ड अफ डाइरेक्टर जस्तो महत्वपूर्ण जिम्मेवारीमा निर्वाचित हुन सफल कनकाई खबर डटकमका अत्यन्तै सहयोगी एवम् शुभचिन्तक संग्रौलाको कार्यकाल सफलताको कामना गर्दै कनकाई खबरका सम्पादक \ प्रकाशक राम निरौलाले आगामी दिन थप रचनात्मक बनोस् भन्दै शुभकामना व्यक्त गरेका छन् ।
