कनकाई खबर / झापाको कनकाई नगरपालिका १ कालिमुडामा कोरोनाका कारण ओली परिवारको खुशी चुँडिएको छ । शोकाकुल ओली परिवारका ३२ वर्षिय एक मात्र छोराको कोरोनाका कारण मृत्यु भएपछि परिवारको खुशी चुँडिएको हो ।
विगत १२ वर्ष अघिदेखि नै अध्ययनको सिलसिलामा अष्ट्रेलीयामा बस्दै आएका ती युवा दोस्रो लहरको कोरोना कहर सुरु हुनुभन्दा केही दिन अघि नै स्वस्थ रुपमै घर आएका थिए । अष्ट्रेलीयामा नै पिआर बनाएर लामो समयपछि नयाँ योजनाका साथ घर आएका युवा आफ्ना बुबाआमा सहित परिवारका साथ छोटो समय मात्र रमाउँन पाए ।
कोरोनाको संक्रमण तिब्र गतिमा अघि बढेसँगै शारिरीक रुपमा सामान्य अस्वस्थ बनेपछि जेठ १ गतेका दिन उनलाई विर्तासीटी हस्पिटल लगिएको पारिवारीक स्रोतले जनाएको छ । स्वास्थ्य परिक्षणका क्रममा कोरोना संक्रमित भएको पुष्टि भएका ती युवाकालागि विर्तासीटीमा विरामी राख्ने बेड उपलव्ध नहुँदा विएन्डसी अस्पताल लगिएको थियो ।
अस्पतालको आइसियु कक्षमा ६ दिन सम्म राखेर उपचार गरे पश्चात उनलाई नर्मल बेडमा सारिएको थियो । दुई दिन सम्म आँफूलाई सुधार भएको भन्दै आफन्तजनसँग सामान्य कुराकानी गर्दै आएपनि शरिरमा अक्सिजनको मात्रा अचानक घटेपछि उनलाई जेठ ८ गतेका दिनदेखि भेन्टिलेटरमा राखेर उपचार भइरहेको पारिवारीक स्रोतले जनाएको छ ।
उपचारमै रहेका ती युवाको आज मंगलबार विहान ६ वजेको समयमा अस्पतालले मृत घोषणा गरेको बताइएको छ । मृत्यु भएका युवाको परिवारका साथ नेपाली सेनाले कनकाई माइमा अन्त्यष्टी गरिएको बताइएको छ । यो सँगै कनकाईमा कोरोनाबाटै मृत्यु हुनेको सङ्ख्या १३ पुगेको कनकाई नगरपालिकाका कोरोना फोकल पर्सन नारायण अधिकारीले जानकारी दिए ।
