कनकाई खबर / झापाको कनकाई नगरपालिकालाई मानवीय सेवामा समर्पित नेपाल रेडक्रस सोसाइटी सुरुङ्गा उपशाखाले सहयोग स्वरुप एउटा एम्बुलेन्स हस्तान्तरण गरेको छ ।
कोरोना भाइरसको संक्रमण तिव्र गतिमा अघि बढेसँगै संक्रमित विरामीहरुको चाप बढ्न थालेपछि महामारीको यो समयमा सरकारलाई सहयोग गर्ने उद्येश्यले स्थानीय सरकारलाई एम्बुलेन्स हस्तान्तरण गरेको रेडक्रस उपशाखाका सभापति प्रविन तिम्सिनाले जानकारी दिएका छन् । कोरोना संक्रमित विरामीहरुलाई अस्पताल सम्म लैजाने र घरमा पुर्याउँने कामकालागि नगरपालिकालाई एम्बुलेन्सको थप आवश्यक्ता महसुश गर्दै रेडक्रसले एम्बुलेन्स हस्तान्तरण गरेको बताइएको छ । आजभन्दा २० वर्ष अघि कनकाई ३ स्थित सुरुङ्गामा स्थापना भई विपत व्यवस्थापन लगायत सामाजिक क्षेत्रमा महत्वपूर्ण सेवा गर्दै आएको सुरुङ्गा रेडक्रसले मे. १ च.९९५ नम्बरको महेन्द्रा एण्ड महेन्द्रा कम्पनीको एम्बुलेन्स कनकाई नगरपालिकाको स्वामित्वमा रहनेगरी हस्तान्तरण गरेको रेडक्रस सभापति तिम्सिनाले बताए ।
संस्थाको तर्फबाट रेडक्रस उपशाखाका सभापति प्रविन तिम्सिना , कोषाध्यक्ष तोयानाथ अधिकारी र एम्बुलेन्स संचालक संयोजक दुर्गाप्रसाद ( राजु ) पाठकले संयुक्तरूपमा हस्तान्तरण गरेका हुन् । त्यस्तै कनकाई नगरका तर्फबाट नगर प्रमुख राजेन्द्रकुमार पोखरेल , उपप्रमुख मञ्जु प्रसाईं , प्रमुख प्रशासकीय अधिकृत मोहन प्रसाद न्यौपाने र सि.अ.हे.ब. ( छैटौं ) खगेन्द्रप्रसाद दंगालले ग्रहण गरेका हुन् । कनकाई नगरमा हाल भारतीय राजदुतावासबाट प्राप्त एउटा एम्बुलेन्स संचालनमा रहेको छ ।
नगरपालिकाले कोरोना संक्रमित आफ्ना नगरवासीलाई प्राथमिक चरणको उपचार सेवा दिने उद्येश्यले भर्खरै मात्र अक्सिजनसहितको २० शैय्याको आइसोलेशन कक्ष संचालनमा ल्याएको छ । रेडक्रसले नगरपालिकालाई सहयोग गरेको एम्बुलेन्सबाट विरामीको उपचार सेवामा थप सहज हुने विश्वास व्यक्त गर्दै कनकाई नगरपालिकाका प्रमुख राजेन्द्र पोखरेलले रेडक्रस संस्थाप्रति धन्यवाद प्रकट गरेका छन् । कनकाई नगर क्षेत्रमा क्रियाशिल विभिन्न सामाजिक संघसंस्थाहरु मध्ये रेडक्रस सुरुङ्गाले स्थानीय सरकारको आवश्यक्तालाई मध्यनजर गरेर यो संकटको घडीमा गरेको सहयोगबाट यहाँका अन्य सामाजिक संस्थाहरुले समेत अनुसरण गर्न सकेमा कनकाई नगरपालिकालाई आत्मनिर्भर बनाउँन सकिने भन्दै कनकाई नगर प्रमुख पोखरेलले नगर क्षेत्रमा क्रियाशिल सवै संघसंस्थाहरुसँग सकारात्मक साथै रचनात्मक सहयोगकालागि अपिल गरेका छन् ।
