कनकाई खबर / कनकाई नगरपालिकाले स्थापना गरेको आइसोलेशन कक्षमा अक्सिजन सिलिण्डर खरिदकालागि कनकाई माविको एसएलसी वर्ष २०६३ को व्याचका विद्यार्थीले रु.६३ हजार सहयोग गरेका छन् ।
कनकाई नगरपालिकाको कार्यालयमा नै गएर विद्यार्थी प्रतिनिधिहरुले नगर प्रमुख राजेन्द्र पोखरेललाई सहयोग रकमको चेक हस्तान्तरण गरेका हुन् । आवश्यक स्वास्थ्य सुरक्षा अपनाउँदै अत्यन्तै संवेदनशिलताका साथ कनकाई नगरपालिका परिसरमा एक संक्षिप्त कार्यक्रमको आयोजना गरी सहयोग रकमको चेक हस्तान्तरण गरिएको हो । वर्ष २०६३ का पूर्व विद्यार्थी पूर्ण श्रेष्ठको सभापतित्व एवम् नगर प्रमुख पोखरेलको प्रमुख आतिथ्य रहेको कार्यक्रममा पूर्व विद्यार्थी भीम राजवंशीले कार्यक्रमको औचित्यमाथि प्रकाश पार्दै आँफूहरुले गरेको सानो सहयोगले विरामीको उपचार सेवामा ठूलो टेवा पुग्ने विश्वास व्यक्त गरे ।
विद्यालयको एसएलसी वर्ष २०६३ को व्याचमा भएका २ सय २५ जना विद्यार्थीहरुले फेशबुक ग्रुपमा भएको सामान्य कुराकानीका आधारमा संकलन भएको प्रारम्भिक चरणको रकम अक्सिजन खरिदकालागि स्थानीय सरकारलाई हस्तान्तरण गरेको संयोजक राजवंशीले जानकारी दिए ।
कोरोना भाइरसको संक्रमण तिव्र गतिमा अघि बढेसँगै सक्रिय संक्रमित नगरवासीहरुको प्राथमिक चरणको उपचार सेवाकालागि नगरपालिकाले नगर स्वास्थ्य अस्पतालमा अक्सिजनसहितको २० शैय्याको आइसोलेशन कक्ष संचालनमा ल्याइसकेको नगर प्रमुख पोखरेलले जानकारी दिए । आइसोलेशन कक्ष संचालनमा पूर्व विद्यार्थीहरुबाट भएको सहयोगले नगरपालिकालाई थप उर्जा मिलेको भन्दै नगर प्रमुख पोखरेलले आँफू पनि कनकाई माविको पूर्व विद्यार्थी भएकाले यस विद्यालयका हालसम्मका एसएलसीका सबै व्याचबाट यो संकटको घडीमा सहयोग पुग्ने विश्वास व्यक्त गरेका छन् । पूर्व विद्यार्थी युनिता दवाडीले सहजीकरण गरेको कार्यक्रममा विद्यालयका प्रधानाध्यापक कर्णवहादुर डाँगीले वर्तमान अवस्थामा विद्यालयका पूर्व विद्यार्थीहरुबाट भएको सहयोग प्रशंसनीय रहेको बताए ।
पूर्व विद्यार्थीहरुले आज नै जनताको जीउधनको सुरक्षाकालागि अहोरात्र खटिएका सुरक्षाकर्मीलाई समेत आवश्यक स्वास्थ्य सुरक्षाका सामाग्री हस्तान्तरण गरेका छन् । ईलाका प्रहरी कार्यालय सुरुङ्गा परिसरमा गएर पूर्व विद्यार्थीहरुले स्वास्थ्य सुरक्षाका सामाग्री सेनिटाइजर, सर्जिकल मास्क, ग्लोब्स लगायतका सामाग्री हस्तान्तरण गरेको पूर्व विद्यार्थी खगेन्द्र महतोले जानकारी दिएका छन् । स्वास्थ्य सामाग्री ग्रहण गर्दै ईलाका प्रहरी कार्यालय सुरुङ्गाका प्रमुख उदयसमशेर जबराले कोरोना भाइरसको च्यान ब्रेक गर्न आँफूहरुलाई थप हौसला मिलेको प्रतिक्रिया दिएका छन् ।
