सुरुङ्गा \ झापा कनकाई नगरपालिका ३ सुरुङ्गाका एक १२ बर्षे वालकले आफ्नो जन्मोत्सव अनाथ आश्रममा रहेका आफ्नै उमेर समूहका अपाङ्ग बालवालिकासँग मनाएका छन् ।
कनकाई नगरपालिका ३ सुरुङ्गा निवासी समाजसेवी गोविन्द र सपना सुवेदीका छोरा युनिक विर्तामोडस्थित ग्रीन स्कुलमा कक्षा ५ मा अध्ययनरत् छन् । उनीहरुका एक छोरी युनिका र छोरा युनिक मध्ये छोराले दैनिक टिफिन खान दिएको रकमलाई बचाएर जम्मा गरेको पैशाले कनकाई नगरपालिका ३ स्थित आफ्नै घर छेउमा रहेको पुकार अपाङ्ग वाल आश्रममा रहेका १३ जना वालवालिकालाई मिठो खाना तथा केहि खाद्यान्न सामाग्रीहरु प्रदान गरेर आफ्नो जन्मदिन मनाएका हुन् ।
वालकको जन्मदिन मनाउनँका लागि कनकाई नगरपालिकाका प्रमुख राजेन्द्रकुमार पोखरेल , लगायतका यस क्षेत्रका संचारकर्मी र नागरिक अगुवाहरुको समेत बाक्लो उपस्थिति रहेको थियो । आफ्ना छोराले बर्षदिन देखि नै स्कुलमा खाजा खान दिएको रकम खुत्रुकेमा बचत गर्ने गरिरहेको र आफुले छिमेकमा रहेको वाल आश्रममा सहयोग गर्ने बताएपछि छोराको समाजसेवी मन देखेर आँफूहरु पनि खुसी भएको युनिकका वुवाआमा गोविन्द र सपना सुवेदीले बताएका छन् ।
बालकले वालवालिकालाई जन्मदिनको केक सबै वालवालिकालाई खुवाउनुका साथै करिव ३ महिनासम्म पुग्ने चामल र तेल, नुन लगायतका सामाग्री समेत प्रदान गरेका छन् । कार्यक्रममा प्रमुख अतिथि बन्नु भएका नगरप्रमुख राजेन्द्रकुमार पोखरेलले बच्चाको काम देखेर आफुलाई समेत केहि गर्न शिक्षा मिलेको भन्दै काम गर्न सिक्नका लागि उमेर बाधक नहुने बताए । कार्यक्रममा बोल्दै समाजसेवी श्याम ओलीले वालकको जन्मोत्सवको सिको अरुले पनि गर्ने हो भने समाजमा कोहि पनि अनाथ वालवालिका भोकै नपर्ने बताए ।
अनाथ आश्रमकी संचालिका निर्मला ओझाले आफ्नो आश्रममा पहिलोपटक मनाइएको जन्म दिनले आश्रममा ठूलो सहयोग पुगेको भन्दै वालवालिकाका लागि गाउँमा पैँचो चामल मागेर संचालन गरिरहेको वेला केहि महिनासम्मका लागि राहत मिलेको वताएकी छन् । कार्यक्रममा वालक युनिक सुवेदीले अघिल्लो बर्ष आफुले साथीहरुलाई घरमै खाना खुवाएर जन्मोत्सव मनाएकोमा यसबर्ष गरिव तथा अपाङ्ग वालवालिकाहरुसँगै बसेर खाना खाएर मनाएको बताए ।
