कनकाई खबर \ झापाको कनकाईमा कोरोनाका कारण एक ८५ वर्षिय महिलाको मृत्यु भएको छ । योसँगै दोस्रो लहरको कोरोनाका कारण कनकाईमा मृत्यु हुनेको संख्या चार पुगेको छ ।
कनकाई ३ निवासी उप्रेती थरकी ती महिलाको उपचारका क्रममा मेची प्रादेशिक अस्पतालमा मृत्यु भएको जिल्ला स्वास्थ्य कार्यालय झापाका कोरोना फोकल पर्सन जीवन चम्लगाईँले जानकारी दिएका छन् । लामो समयदेखि उच्च रक्तचापबाट पिडित महिलाको केही दिन अघि श्वासप्रश्वसमा समस्या आएपछि उपचारकालागि विर्तामोडस्थित विएन्डसी अस्पताल लगिएको थियो ।
अस्पतालले गरेको परिक्षणबाट कोरोना संक्रमित पुष्टी भएपछि उनलाई तीन दिनसम्म विएन्डसी अस्पतालमै राखेर उपचार गरिएको थियो । त्यसपछि घरमा ल्याएपनि पाँचदिन अघि मात्र उनलाई भद्रपुरस्थित मेची प्रादेशिक अस्पताल लगिएको थियो । उपचारकै क्रममा आज दिउँसो साडे तीन बजे उनको निधन भएको पारिवारीक स्रोतले जनाएको छ । उनको आज अपरान्ह परिवारका साथ नेपाली सेनाले कनकाई घाटमा दाहसंस्कार गरेको छ ।
पहिलो चरणको कोरोना कहरमा ६ जना कनकाईबासीको ज्यान गएको कनकाई नगरपालिकाका कोरोना फोकल पर्सन नारायण अधिकारीले जानकारी दिएका छन् । अधिकारीका अनुसार दोस्रो लहरको संक्रमणका कारण कनकाईमा ४ सय ८३ जना संक्रमित भएका छन् भने २ सय ७७ जना डिस्चार्ज भइसकेका छन् । होमआइसोलेशनमा १ सय ८९ जना रहेका छन् भने विभिन्न अस्पतालमा ७ जनाको उपचार भइरहेको बताइएको छ ।
