कनकाई खबर \ कोरोना भाइरसबाट संक्रमित झापाको अर्जुनधारा नगरपालिकाका ५१ वर्षिय प्रमुख प्रशासकीय अधिकृत महेन्द्रकुमार खाम्याहाङको मृत्यु भएको छ ।
श्वास प्रश्वासमा समस्या आएपछि उनको बिर्तामोडस्थित बिएन्डसी हस्पिटलमा उपचार भइरहेको थियो । उनलाई वैशाख १० गते एन्टिजेन परीक्षण गर्दा संक्रमण पुष्टि भएको थियो । लामो उपचार गरिरहँदा पनि उनको स्वास्थ्यमा सुधार आउन सकेको थिएन । उपचारकै क्रममा आज बिएन्डसी हस्पिटलमा निधन भएको बताइएको छ ।
उनको निधनबारे झापाका प्रमुख जिल्ला अधिकारी श्रवणकुमार तिमल्सिनाले पुष्टि गरेका छन् । उनको अहिले २ बजेर ३० मिनेटमा निधन भएको प्रजिअ तिमल्सिनाले जानकारी दिए ।उनलाई वैशाख १७ गते थप उपचारकालागि बिएन्डसीमा भर्ना गरिएको थियो । संक्रमणपछि उनलाई केही दिन आफ्नै क्वाटरमा तथा २ दिन अर्जुनधारा नगरपालिकाले स्थापना गरेको आइशोलेसनमा राखिएको बताइएको छ ।
मेचीनगरपालिकाबाट ८ महिनाअघि अर्जुनधाराको प्रशासकीय जिम्मेवारी सम्हाल्न आएका खाम्याहाङ एक ईमान्दार र कुशल प्रशासकको रुपमा रहेको अर्जुनधारा नगरपालिकाका प्रमुख हरि रानामगरले बताएका छन् ।
