कनकाई खबर \ कोरोना भाइरसको संक्रमणका कारण कनकाईमा ६० वर्षिय खरेल थरका एक कृषकको निधन भएको छ ।
कनकाई ७ को कालीमुडा निवासी एक सक्रिय कृषकका रुपमा स्थापित खरेलको निधनसँगै दोस्रो लहरको कोरोनाका कारण कनकाईमा ज्यान गुमाउँनेको संख्या तीन पुगेको छ ।
बुधबार बेलुका निधन भएका पुरुष १५ दिनदेखि सामान्य रुघाखोकी लाग्ने र ज्वरो आउँने भएपछि स्वास्थ्यकर्मीसँगको परामर्शमा घरमै औषधि सेवन गर्दै बसेका थिए । कोरोनाको लक्ष्यण देखिएपछि गत सोमबार भएको पिसिआर परिक्षणमा उनको रिपोर्ट पोजेटिभ आएपछि होम आइसोलेशनमा बस्दै आएका थिए । तीनदिन अघि मात्र कनकाई नगरपालिकाका प्रमुख राजेन्द्र पोखरेलको उपस्थितीमा नगर अस्पतालका डाक्टर अभिषेक नायकले अक्सिजनसहितको आवश्यक औषधि घरैमा गएर प्रदान गरेका थिए । स्थानीय सरकार प्रमुखको उपस्थितीमा भएको परामर्शसहितको प्राथमिक उपचारका क्रममा विरामीले आँफूलाई राहतको महसुस गर्दै आएका थिए ।
अचानक बुधबार दिउँसो शरिरमा अक्सिजनको मात्रा ज्यादै न्युन देखिएपछि कनकाई नगरपालिकाको एम्बुलेन्समा उनलाई मेचीअञ्चल अस्पताल लगिएकोमा बाटैमा उनको निधन भएको पारिवारीक स्रोतले जनाएको छ । तत्काल रातको ११ बजे परिवार र आफन्तजनको उपस्थितीमा नेपाली सेनाले कनकाई माईमा अन्त्यष्टी गरेको बताइएको छ । उनी कुनै राजनितीक दलको नेता नभएर एक सर्वसाधारण कृषक भएको पारिवारीक स्रोतले जनाएको छ ।
